Atletico player thar De Paul

Atletico Madrid chuan Udinese aṭangin Rodrigo de Paul chu pound maktaduai 29.9 in an lalut. Argentina international midfielder hian La Liga champion tan season nga daih contract a ziak.

Kum 27 mi De Paul hian tun hnai season nga chhung chu Udinese tan ṭha takin a lo khel tawh, season tin league match 30 chuang a khel ziah - season liam ta bikah khan league match 36 a khelh aṭangin goal kua a khung.

La Liga club Valencia tan pawha khel tawh De Paul chuan, "La Liga champion ka zawm thei hi ka lawm, club tana ka hnathawh tur leh mawhphurhna tur ka hria a, min ti phur takzet. Atletico ka zawm hi ka football zinkawnga hmasawnna ropui a ni," tiin a sawi.

Atletico hian season hmasa khan Real Madrid leh Barcelona tlan pelin league nomawi an chawi. Kar hmasa khan winger Marcos Paulo an lalut tawh a, an manager Diego Simone chu 2024 thleng daih contract an ziah thar pui tawh bawk.

Spanish club chuan thuchhuah siamin, "Atletico Madrid leh Udinese chu Rodrigo de Paul chungchangah kan inrem, player thar hian season nga daih contract a ziak. Tharum a ngah a, ball a thiamin goal khung leh ṭhiante khung tur siamsak a thiam a, kan ṭangkaipui ang," an ti.

Copa America khelh zawh takah khan De Paul hi Argentina champion theih nana player pawimawh a ni. Coach Lionel Scaloni-a'n player a siksawi nasa a, tlemte chauh chhawr rim bik a neih zingah De Paul a tel.

5ft 11in a sang midfielder hian Copa America match pawimawh a khel vek. Group hmahruaitu an nih chian tawh hnua Bolivia an hmachhawn ṭum erawhin hahchawlhtir a ni a, knockout stage chinah phei chuan a bul ṭantu zingah a tel vek a ni.

Copa America final-ah khan Argentina hian a thlengtu Brazil 1-0 in an hneh. Goal awmchhun Angel di Maria-a'n a khung theih nan De Paul hian hla tak aṭangin through ball ṭha bik a pet a, an champion theih chhan a ni hial.

Argentine manager Simone kaihhruaina hnuaiah Atletico Madrid hian season tharah pawh Barcelona leh Real Madrid an cho ngam leh ang.