A sang 10 zingah Serena a tel lo

Hmeichhe tennis thuneitu sang Women‘s Tennis Association (WTA) chuan nimin khan world ranking thar a ti chhuak a, hun rei tak chhung world number 1 pawh lo ni tawh Serena Williams chu a sang zual 10 zingah a tel phak lo.

American star hi Wimbledon-ah khan a inhliam a, match hmasa bera Aliaksandra Sasnovich nen an inkhelh lai zo hman loin a inhnukdawk. Season hmasa final a luhna hmunah a ranking point neih sa a humhim theih loh avangin a tlahniam.

Grand Slam vawi 23 champion tawh hi player pariat ngawtin an rawn lehpel a, 16-na dinhmun a luah phak hram. Tokyo Olympic a khelh dawn loh zui avangin a ranking siam ṭha tur chuan a nghah leh rih a ngai dawn.

Kum 39 mi Serena hian tun hmain chawlhkar 319 chhung chu number 1 dinhmun a lo luah tawh. Mahse, a kum a tam deuh hnuah a tlahniam ve zel a, tunah chuan a chung bera awm chu thil harsa tak a ni tawh ang.

Wimbledon champion Ashleigh Barty chuan pakhatna dinhmun a la luah chhunzawm. Australian star hian point 9,635 a nei, amah hnaih bertu Naomi Osaka aiin point 2300 zetin a nei hnem zawk a, number 1 ni chungin season a khar ngei hmel.

Japanese star Osaka hian rilru lam harsatna a nei a, French Open aṭanga a inhnuhdawh hnuah Wimbledon pawh a khel lo. A chhungte leh ṭhian ṭhate bulah hun zalen a hmang mek a, engtik hunah nge tennis khel tura a lo kir leh dawn a la sawi thei lo.

Wimbledon finalist Karolina Pliskova pawhin hma a sawn, player paruk ngawt kal kalin Czech nula hian 13-na aṭangin pasarihna dinhmun a rawn luah dawrh.

Tennis season kal laiah inlena lian pathum an khel tawh. Grand Slam pali zinga mi - Australian Open, French Open leh Wimbledon an khel tawh, a hnuhnung ber atan US Open an la khel ang.