Mohun Bagan an bazar ngawrh

Indian Super League club ATK Mohun Bagan an bazar chhunzawm zel a, Mumbai City midfielder Bidyananda Singh chu kum khat chhung atan contract an ziahpui.

Kum 23 mi midfielder hian kum 2016 khan ATK zawmin ISL-ah a professional career a ṭan a, 2017-2019 khan Bengaluru B team a zawm - 2019 aṭang khan Mumbai City-ah a khel ṭan a, season hmasaah erawh a inlan miah lo.

Mohun Bagan hian Liston Colaco, Amrinder Singh, Joni Kauko, Deepak Tangri, Ashutosh Mehta leh Hugo Boumous te an lalut tawh bawk a, player langsar ṭhiau an ni.

Kum 22 mi Colaco hian Hyderabad aṭangin vaibelchhe khat velin an lei nia sawi a ni a, Kauko hi Euro 2020 khelh zawh takah khan Finland tan a inlan bawk.

Kum 25 mi Boumous hian season hmasa khan Mumbai City chu FC Goa aṭangin a zawm a, Mumbai club hian vaibelchhe 1.72-in an lei - hei hi Indian football-a transfer fee record a ni a, Bagan hian tun season-ah hei hi an khum.

French-Moroccan midfielder lei nan hian Bagan hian vaibelchhe hnih an senga ngaih a ni a, Indian football-a transfer fee record thar a ni.