Norwich-in midfielder thar an nei

Premier League kai thar Norwich City chuan French midfielder Pierre Lees-Melou chu Nice aṭangin an lalut a, Ligue 1 club player lei nan hian pound maktaduai 3.5 an inseng.

Kum 28 mi Lees-Melou hian kum thum chhung atan contract a ziak a, season hman zawh takah khan inelna hrang hrangah match 33 khelin goal nga a khung a, assist vawi hnih a nei bawk.

Norwich City manager Daniel Farke chuan, "Technical lama sang tak player a ni a, ball a thiam hle. Chu mai piahlamah chuan tharum a ngah a, inkhelh chhungin a taima em em zel.

"Position hrang hrangah khelin, role hrang hrangah buai loin a khel thei a ni. A kum a la naupang a, tawnhriat a nei ṭha hle thung. Club lian tak Nice tana khel ṭhin a nih avangin inkhel boruak sang tak takah player ṭha tak takte nen an khel tawh ṭhin a ni," a ti a, a player thar chu a fak hle.

Lees-Melou chuan, "Norwich khelh dan duhawm tak hi ka lo hre fo tawh a, he club khelh dan phung, duhna leh rilru put hmangte pawh ka hria a, chu chuan min ti phur takzet a ni," tiin a sawi.