Roma keeper thar tur Rui Patricio

AS Roma chuan Premier League club Wolves aṭangin Rui Patricio an la dawn a, an keeper chhuak tur hmun ruak luah khat tur hian Olympiakos aṭangin Jose Sa an lalut ve thung ang.

Portugal international Patricio manah club pahnih hi pound maktaduai 10-in an inrem, nimin khan medical test a nei a, he thu i chhiar meuh chuan Patricio hian Italian club Roma a zawm fel tawh tura ngaih a ni.

Patricio leh Roma te hian inbiakna chu an nei rei tawh. Mahse, Wolves lamin a thlakna tur an zawng phawt - an duh Jose Sa an lak theih dawnah an chuah phal chauh. Olympiakos pawhin Jose chhuah hma hian a thlak nan Czech Republic keeper Tomas Vaclik an bei fel hmasa.

Kum 28 mi Patricio hian 2018 khan Sporting aṭangin Wolves hi a zawm. English club tan rinrawl a ni a, league match bikah phei chuan season thum chhungin inlan loh match hnih chiah a nei. 2019-20 season phei kha chuan league match bik a khel kim vek.

Jose Mourinho-a'n Roma a pan hnuah team dinthar leh a tum mek zel. Keeper bakah hian Arsenal midfielder Granit Xhaka pawh lakluh an tum a, indawrna a kal mek - Swiss midfielder man zat turah club pahnih an la inrem thei rih lo thung.