Chhungkua, ram leh Maradona tan - Messi

Lionel Messi chuan Copa America nomawi an chawi chu a chhungte, ram leh a mi ngaihsan Diego Maradona tan a hlan thu a sawi a, hripui leng kara an ram mipui thlawpna an hmu ṭha chu ropui a tih thu a sawi bawk.

Argentina hi inelna thlengtu Brazil hnehin an champion a, kum 1993 hnua a vawi khat nan inelna lianah an champion ve leh chiah. Bracelona star Messi-a'n an ram tana a nomawi hmasa ber a chawi a ni.

Messi chuan, "Inkhel zel tura min thlawptu leh min fuih tlattu ka chhungte tan kan hlawhtlinna chan hi ka hlan, chu bakah tawp chin nei loa min thlawp tlattu ka ṭhiante tan pawh ka hlan.

"Kan ram mipui maktaduai 45 ten hripui leng karah pawh min thlawp reng a, ramin harsatna a tawh lai pawhin min thlah thlam loh avangin an chungah ka lawm takzet a ni, lungngaihna hi lawmnain a la hneh ngei ang," a ti.

Copa America kha a tirah chuan Argentina leh Colombia ten an inthlen ṭawm tura tih a ni. Mahse hri leng a nasat avangin ram pahnih hian an thleng thei lo a, chawpchilh takin Brazil kutah an nghat.

Messi chuan, "Champion lawmin kawtthlerah mi tam tak an pungkhawm tih ka hria, a mak hran lo a, dem theih pawh an ni lo. Mahse, mitinte hri leng laka fimkhur turin ka duh, champion vanga kan lawmna hian hri leng vanga kan lungngaihna hliah thei se tih hi ka duhthusam,"a ti.

Nikum November thla khan Argentina hian an legend Diego Maradona chu lungphu chawl vangin an chan, an player ropui hian 1986 khan FIFA World Cup a chawipui a, a hnuah an la champion leh lo - nakkumah Messi hoin a hnungzui an tum ang.

Kum 34 mi Messi chuan, "Diego khan a awmna hmun aṭangin min lo lawmpui ve ngei ang, kan hlawhtlinna hi a tan a ni," tiin hlawhtlina an chan lai pawhin an mihrang kal hmasa an hriatreng thu a sawi chhuak bawk.

Copa America khelh zawh takah khan Messi hian goal li a khung a, a ṭhiante khung tur vawi nga a siamsak bawk.

Messi hian June thla tawp rual khan Barcelona tana a contract a hmang zo, tunah hian club nei loin a awm mek. Catalan club nen contract thar chungchanga indawrna a kal mek a, an inrem thei ngei dawn em, tih erawh hriat a la ni lo.