European Championship 2020 Thlirletna

Euro-ah goal 142 a lut, engtin nge a luh?
European Championship 2020 khelh zawh takah goal 142 ngawt a lut a, Euro inelnaa goal luh tam ber ṭum a ni. Kum 2016 aṭang khan Euro inelnaah team 24 an tel a, khami ṭum khan goal 108 lutin tun ṭumah hian goal 34 ngawtin a tam zawk.

A goal tam
Euro 2000-ah khan team 16 an tel a, match 21 khelin goal 85 a lut. Khami ṭum khan match tinah goal 2.74 lut ang a ni a, kuminah hian match 51 awmin match tinah goal 2.78 lut ang a ni. Kumin Euro hi group stage awm hnua match tina goal luh ṭhat ber ṭum a ni a, Euro 2000 (2.74 per match) leh Euro 1984 (2.73 per match) te aiin a ṭha zawk.

Engtin nge a luh?
Euro 2020-a goal 142-ah hian ke ding lamin goal 61 khung a ni a, ke vei lamin goal 43 an khung bawk. Lu hmangin goal 27 khung a ni a, mahni lama tih luh goal 11 a awm. Euro 2008 leh 2012-ah khan ke vei lam hmanga goal khung hi 25% aiin a hniam a, kum 2016-ah khan 34% pel lehin tun ṭumah hian 30.3% a ni.

Kumin danglamna erawh own goal a tam a, vawi 11 zet a awm. Euro 2020-a own goal awm zat hi Euro 2012 leh Euro 2016 belh khawm goal kua aiin a tam zawk.

Engtin zel?
Goal hmasa ber khung tur hian chawhrualin minute 32 mamawh a ni a, Euro 2016-a goal hmasa ber lut tura hun mamawh aiin minute kuain a tla hniam.

Penalty area chhung aṭangin goal 123 khung a ni a, penalty area pawn aṭangin goal 19 a lut. Goal lut zawng zawng aṭanga goal 132 hi open play aṭanga lut a ni a, goal kua hi penalty niin direct freekick aṭangin goal khat chiah a lut.

Penalty ṭum 16 zet a awm a, chung zing aṭang chuan goal kua khung a ni a, vawi nga goalkeeper-in an save a, ṭum hnihah goal zawnah an pet lo.

Thlirna Tawi
Engtin nge goal a luh
61 Ke Dinglam
43 Ke Veilam
27 Lu hmangin
11 Own goal

Goal luh dan
132 Open play
9 Penalty
1 Direct free-kick

Penalty hi
16 Penalty pek zat
9 Goal-a chantir
5 Keeper-in a save
2 Goal zawna pet loh

Euro 2020-ah tuten nge goal khung
Euro 2020-ah Italy leh Spain ten goal 13 ve ve an khung a; Denmark (12), England (11), Belgium (9), Netherlands (8) leh Switzerland ten a dawt.

Mimal goal khung tam ber Portugal captain Cristiano Ronaldo leh Czech Republic striker Patrik Schick ten goal nga ve ve an khung a, Juventus forward Ronaldo hian assists a ngah zawk avangin Golden Boot a dawng.

Ronaldo leh Schick te goal khung ang zat chiah hi Austria (5) leh Sweden (5) ten an khung. Poland (4), Wales (3), Hungary (3), Russia (2), Slovakia (2), North Macedonia (2), Scotland (1), Turkey (1) leh Finland (1) te phei chuan Ronaldo leh Schick te khung zat an khung pha lo.