Ronaldo hmachhawn chuan fimkhur a ngai - Torino defender

Serie A club Torino defender Koffi Djidji chuan Cristiano Ronaldo a hmachhawn thei chu a lawm thu a sawi a, chutih rualin Juventus forward an hmachhawn a nih chuan hun rei lote chhung pawh inthlahdah zeuh theih a nih loh thu a sawi bawk.

Juventus leh Torino te hi club inhal leh inel an ni hran lo, an player neih dan leh sulhnu en phei chuan club inthlau tak an ni. Mahse, Turin khawpuia inbengbel ve ve an ni a, an intawnna chu 'Derby della Mole' tih vuah niin boruak a dai ngai lo.

Club pahnih intawn hnuhnung ber chu 2019 November 2 kha niin, Dutch defender Matthijs de Ligt-a goal khat hmangin Juve lamin 1-0 in hnehna an chang hram, minute 90 chhung Ronaldo inlan mah se Juve hi awlsam takin an chak bik lo a ni.

Kum 27 mi Djidji chuan, "Ronaldo hi chu player mak leh danglam bik a ni, ani nen in inhmahchawn a nih chuan atthlak taka chet a tih chi miah loh. Fimkur leh rilru fim taka chet a ngai, tihsual zeuh a awm a nih chuan min hrem nghal zel.

"Player tin hian theihna leh ṭhat bikna lai an nei a, Ronaldo erawh kawng engkimah midang chunga leng a ni. Ani nen league pakhata kan khel dun hi ka lawm a, nakinah chuan kan inhmachhawn ve ṭhin tih hi ka la sawi fo ang," a ti.