Russia chungchang November-ah ngaihtuah dawn

Russian anti-doping agency (RUSADA) chuan Olympic hmachhawn thei lo tura hrem an nihna an khinglet a, infiamna lama thubuai remtu sang ber Court of Arbitration for Sport (CAS) chuan Russia chungchang hi November thlaah a ngaihtuah ang.

World Anti-Doping Agency (WADA) tarlan dan chuan Russia hian an mahni sorkar hriatpuina hnuaiah an infiammiten dan an bawh chhia tih an sawi a, Rio Olympic-ah khan Russia hi an tel ve an phal lo; Tokyo Olympic atan pawh hremna hi ken tlang a ni.

Mahse, hremna an tawh danah Russia an lungawi bik lo, an dikna chanvo ang an hmu tawh loah ngaiin CAS hnenah an zualko; November 2-5 chhungin insawifiahna leh thubuai ngaihtuahna hi an nei ang.