Roger = Grand Slam nomawi 20 Ropuia a Ropui leh ta

Roger Federer chuan Marin Cilic hnehin a vawi ruk nan Australian Open nomawi a chawi. Switzerland fa chuam hian Grand Slam title 20 a lak tlinna chiah niin Open Era china record nei ṭha ber a nihna a belhchhah zel.

Nimin tlai khan Australian rama an tennis court court chhuanvawr leh hmingthang Rod Laver Arena-ah final khelh niin, world number 2 Federer hian darkar thum leh minute thum chhungin world number 6 Cilic lakah 2-6, 7-6, 3-6, 6-3, 1-6 in hnehna a chang.

Melbourne Park-ah hian Novak Djokovic leh Roy Emerson ten nomawi vawi ruk an chawi tawh a, hard court inelna liana sulhnu nei ṭha pahnih te record hi Federer hian a nihrual chiah. Federer tan kum 35 a tlin hnu lama a nomawi lian pathumna a ni.

Final chu
Kum 36 mi Federer tan a Grand Slam final vawi 30-na a nih bakah Australian Open bikah a vawi sarihna a nih laiin, a khingpui Cilic tan erawh major tournament final a vawi thumna chiah niin Melbourne Park bikah a vawi khatna a ni thung.

Tun Australian Open bikah Federer hian match hmasa parukah set a la hloh lo a, final thleng tur hian court chhungah Cilic aiin darkar ruk ngawtin hun a hmang tlem zawk. Attacking game hmuhnawm khel ṭhin Federer leh ball vaw na Cilic te hi inkhel tawk viau tura ngaih an ni.

Inkhel ṭan hmain Federer-a'n bul ṭan ṭhat a pawimawh thu a sawi a, service neih ṭhat leh hum theih a pawimawh zia a sawi bawk. A sawi lawk ang ngeiin Federer-a'n bul a ṭan fuh hle, game hmasa pali la vekin 6-2 in set a la zui nghal.

Set hnihnaah erawh tie break an khelh hnuin Cilic-a chungnung ve thung. Set hnih ve ve an lak hnuah deciding set khelh a ni a; hun pawimawh lai berah Federer-a'n a tawnhriat neih hmang ṭangkaiin game khat chiah a hloh - chiang takin a champion.

Record duhawm
Kum 1974 US Open-ah khan khatih hunlaia kum 39 mi Ken Rosewall chuan Grand Slam final a khel a, ani hnuah chuan Federer hi inelna liana final lut thei upa ber a ni.

Grand Slam tourna­ment-in professional player te inlan ve an phal chin, kum 1968 chin hi tennis khawvelah chuan Open Era tih a ni a, mipa player zingah Federer aia record nei ṭha an awm lo. Hmeichhe player Serena Williams (23 titles) leh Steffi Graf (22) te chu sulhnu nei ṭha an ni bawk.

Roger a chungnung
Season hmasa khan Federer leh Cilic te hi Wimbledon title inchuhin an inkhel tawh a, Swiss star hian darkar khat leh minute 41 chhung lekin hnehna a chang.

Kum li liam ta khan player pahnihte hi New York-ah an intawng a, hemi ṭum hian Cilic-a'n hnehna changin US Open final a lut. Croatia tlangval hian Kei Nishikori hneh lehin a vawi khat nan Grand Slam nomawi a chawi zui bawk.

Mahse, tun hmain player pahnihte hi vawi kua an intawng tawh a, world number 2 Federer hian vawi riat hnehna changin a chungnung hle.

Tunlai player zingah Nadal (16 Gran Slam titles) chu Federer hnaih bertu a ni a, player dangin beisei an phak loh bakah kum upat tawh hnuah pawh Roger Federer hi a ṭha ber a la nih avangin record duhawm dang pawhin a la zui zel a rinawm hle.