Wozniacki tan nomawi hlu bik

Caroline Wozniacki chuan a vawi khat nan Australian Open nomawi a chawi ta. Grand Slam title a lak ṭum khatna niin he a hlawhtlinna vang hian world ranking chhuak thar berah Simona Halep khumin number 1 a ni dawn bawk.

Inrinni tlai Rod Laver Arena-a inkhelah seeded pahnihna Wozniacki hian seeded pakhatna Halep lakah darkar hnih leh minute 49 chhungin 7-6 (7-2), 3-6, 6-4 in hnehna a chang.

World number 1 thar tur Wozniacki hian Grand Slam vawi 43 a khelhna chiah a ni a, thla 17 liam ta mai kha chuan world number 74 a la ni. Mahse, tun hnaiah a khel ṭha chho hle a, Denmark player zingah tennis inelna liana nomawi chawi thei hmasa ber a ni.

Kum 27 mi Wozniacki chuan, "He inelna a champion tur hian tun hma aṭangin duhthu ka sam tawh ṭhin a, tunah chuan ka duhthusam kha a takin a thleng dik ta," a ti. Wozniacki hian US Open final vawi hnih a khel tawh a, a chak lo zawkah a ṭang - tunah erawh a hun a thleng ta.

Fiahna chu

Player pahnihte Grand Slam final vawi thum an khelhna ve ve a ni a, Melbourne Park-ah an vawi khatna a ni thung. Wozniacki-i'n harsa lutuk loin set khatna a la.

Set hnihnaah Woz­niacki a chefuh hmasa leh a, 4-1 in hma a hruai. Mahse, Halep a insiamṭha thuai a, game thum la zawnin a tho chhuak a, set a la. Set thumnaah player pahnih an inbei tawk a, 4-4 a nih hnuah Halep-i'n a service hum zo loin - ball vaw na zawk Wozniacki chuan a service a la zui a, nomawi hlu bik a chawi.

Wozniacki hian a match hmasa lama Jana Fett a hmachhawn ṭumin match point vawi hnih a inchhanhim thei a, Halep laka dinhmun ṭha lo zawk deuha a din hnuah pawh huaisen taka a beih let theih avangin nomawi leh world number 1 nih hi a phu a ni.