MSL4 tip off a ni ta

Tualchhung basket­ball inelna lian leh ngaih­hlut ber Mizoram Super League Season (MSL) 4 chu January 26 zan khan Siby's Firm, Salem Vengah Dr. N Palai-a'n a tip off.

MSL khuhhawnna hunah hian MBBA hruaitute leh sawm bik te bakah club tin hruaitu leh player an kal ṭha hle. Club tin captain ten thutiam an la a, MSL Handbook leh MBBA Time Magazine tlangzarh a ni bawk.

Naktuk zan aṭangin Hawla Indoor Stadium, Republic Vengthlangah MSL4 hi khelh ṭan a ni dawn a, champion lai Mission Veng Vikings leh Tuikual South ten match hmasa ber an khel ang. Semifinal aṭangin R. Dengṭhuama Indoor Stadium-ah khelh a ni thung ang.

Kuminah hian team paruk Mission Veng Vikings, Khatla TBL, Tuikual South, Zarkawt BCA, Mission Vengthlang Hollow leh Republic VR4 te an inel dawn. MSL hmasa lama an hmel kan hmuh ṭhin Zarkawt Serpents an relegate tawh a, VR4 hi team thar an ni.