Minerva an champion dawn?

I League season hmasaah beisei loh takin Aizawl FC an champion tawh a, tun season-ah India-in beisei loh champion a hmu nawn leh a nih pawhin a mak lo ang - Minerva Punjab chuan Inrinni khan an mikhualna ramah Neroca chu 1-0 in an hneh a, I League-ah hma an hruai chhunzawm zel.

Minerva hi anmahni hnaih bertu Manipur club ai hian point liin an sang fal tawh a, match hnihin an khel tlem zawk bawk - anni aia match khata khel hnem East Bengal chu champion la beisei zinga mi an ni a, Kolkata club hian point rukin Punjab club hi an phak lo ve mek bawk.

Shillong Lajong laka chak lo hlim Neroca-in hnehna chan ngei tum mah se an inrin hmain goal an chhuah nghal a, minute hnihna lekah Bhutanese forward Chencho Gyeltshen chuan goal a khung nghal. Neroca boss Gift Raikhan-a'n an inrin hmaa goal an chhuah avangin rang takin substitution pahnih siam nghal mah se Minerva tlarhnung an ṭhiat thei chuang lo.

Inrinni zan inkhel dangah Chennai City-in Indian Arrows an mikhual a, goal khung loin team pahnih an ṭin. Arrows coach Luis Norton de Matos-a'n Edmund Lalrindika a chhawr lo a, Mizo tlangval aia thlan Rahim Ali-a'n goal khungna chance-ah a khung thei lo - Chennai tan Joachim chuan post a pet per a, a shot neih ṭha zet chu keeper Prabhsukhan Gill-a'n ṭha takin a dang bawk. French striker Joachim a vanduai a, a hun ṭha neih dangah offside anga phar ni mah se replay en erawh chuan offside a ni lo.

Nimin tlai inkhelah Gokulam Kerala chuan Shillong Lajong an mikhual a, 3-2 in an hneh. Meghalaya club-in Abdoulaye Koffi leh Oh Joo-Ho hmangin vawi hnih ngawt hma hruai mah se Kerala club-in Mahmood Al Ajmi, Kivi Zhimomi leh Arjun Jayaraj hmangin an si phurh an sut zo.

Lajong tan captain Samuel Lalmuanpuia'n Oh Joo-Ho goal khung tur a siamsak a, Zemabawk North rawlthar hi a khel ṭha hle. Gokulam tan Laldampuia chu minute 69-naah tlan luhtir a ni bawk.