United telna Sanchez a dang

Jose Mourinho chuan FA Cup fourth round-ah Alexis Sanchez chu bul ṭantir nghalin Chilean forward telna Manchester United chuan harsatna nei loin Huish Park-ah League Two club Yeovil Town chu 4-0 in an hneh.

Zirtawpni zan inkhelah Alexis-a'n United goal hmasa pahnih Marcus Rashford (41') leh Ander Herrera (61') te goal khung chu a siam sak a. Portuguese manager Mourinho chuan inkhelh banah Sanchez-a'n team chhungah puitlinna leh danglamna a rawn thlen thu a sawi.

Minute 72-naah Alexis hi lakchhuah a ni a, substitute pahnih Jesse Lingard (89') leh Romelu Lukaku (90+3') ten an khung belh. Mourinho-a'n United enkawl zel turin kum 2020 thleng contract a pawtsei a, a kum 55-na piancham leh Red Devils match 100 a enkawlnaah hnehna an chang bawk.

Mourinho-a'n Nilai zanah Tottenham Hotspur an hmachhawn dawn tih hrechungin Burnley an hneh ṭum aṭangin Juan Mata chiah inkhel bul a ṭan nawntir a, second team anga ngaih theihah hian captain dik tak zawk Michael Carrick chuan armband hrengin Alexis chu mipui mit fukna a ni.

Yeovil lamin 5 ft 6.5 inches chauha sang Sanchez chu bitum deuh mah se Arsenal aṭanga United zawmtu hian thil harsa tih a tum lo a, awlsam leh hlawk taka khelin 'killer pass' a pek ngamna chu Mourinho-a'n sum senga a lakluh ngamna chhanah a ngaih theih.

Inkhelh banah Mourinho chuan, "Goal hnihna kan khung theihna tura Alexis-a'n a pass tur a thlan dan kha player naupang zawk Marcus Rashford te ang chuan zam vangin an ti ngam ṭhin lo. Ani hian kan team-ah puitlinna leh a ṭha lama danglamna a rawn thlen a ni," tiin player thar a fak.

Premier League-a United khingpui tur Tottenham erawhin League Two club Newport County an draw avangin replay an khelh a ṭul dawn. Rodney Parade-ah mualneituin minute 38-naah Padraig Amond tauh luh hmangin hma hruai mah se Spurs-in Harry Kane hmangin minute riat chiah a awm tawh tihin an sut.

Tottenham boss Mauricio Pochettino chuan, "FA Cup khelh zel châkna kan lantir lo a ni. Kan khelh dan leh kan result a lungawithlak loh," tiin a sawi. Spurts khingpui Welsh club Newport County hi sum lama harsatna vangin kum thum liam ta khan club tihtawp te an lo tum tawh a, Spurs hi kum 1986 hnua top flight team Rodney Parade-a competitive match khel leh hmasa ber an ni.

League Two-a 9-na ni mek Newport erawhin Spurs an chelh tluan theih loh avangin an ui ang a, chutichung chuan Wembley Stadium-a replay an khelh dawn avangin an result hi inchhuanna tur a ni. Newport manager Mike Flynn chuan, "Hun tawp dawn hnaiha goal kan chhuah avangin ka na vek a, amaherawhchu a nihna tak thlir chuan second half-ah kha chuan kan inthlauh em avangin kan khan lo deuh a ni," tiin a sawi.