Ronaldo hoin Real an chak
Real Madrid-in an mangchhia lak ata harhchhuah tumin hnehna an chang ve leh ta - Inrinni zan khan La Liga match-ah Valencia chu 4-1 in an sawp a, Cristiano Ronaldo chuan goal hnih a khung. Portuguese forward goal khung hi penalty aṭanga a chhuih luh ve ve a ni.
Real-in hnehna an chan avangin an chung chiaha awm Valencia hi point hnih chiahin an phak lo tawh - Zinedine Zidane-a naute hian match khatin an khel tlem zawk bawk a, Champions League khelh lo mai hlauhna thinlung vai kianin a awm ṭan.
Inkhel chu
Minute 16-na lekah Real Madrid-in penalty an hlawh chhuak nghal a, khualmualah penalty pet turin a hlawh chhuaktu Ronaldo a lo pen chhuak - Portuguese forward hian a khung chiang hle. Minute 38-naah Real-in Karim Benzema hmangin penalty bawk an hlawh chhuak leh a, a pettu pawh a ngai tho Ronaldo bawk a ni. Chawlhlawk an hmanin Real hian 2-0 in hma an hruai.
Second half ṭan a nih hnuah Valencia tan Santi Mina chuan an si phurh sut ṭhenin a team tan beiseina siam sak mah se an mualah Valencia-in beisei angin an khel chhunzawm thei lo - Marcelo-a'n Real tan an goal thumna a khung leh a, Toni Kroos chuan long range goal hmangin mawi zetin a hnu a khar. Real an chak.
BBC an lo kir
Zidane-a'n champion nomawi beisei tawh lo mah se a nauten inrintawkna an hloh tawh an neih let theih nan hnehna an chan a ngai tih a hria a, Karim Benzema, Gareth Bale leh Cristiano Ronaldo te inkhel bul a ṭantir - football khawvelin BBC tia a hriat lar, tlarhma pathum hlauhawm ber pawl ni ṭhin hian Valencia hmachhawna inkhel bul an ṭan chiah khan ni 279 hnuah a vawi khat nan inkhel bul an ṭan ve leh chiah!
Hetihlai hian hliam vangin Isco leh Sergio Ramos te chuan Valencia hi an hmachhawn ve thei lo - Real hi Copa del Rey aṭangin petchhuah an ni tawh a, La Liga-ah lah nomawi beisei thei an ni tawh lo. Ronaldo-a'n a lo sawi tawh anga Champions League nomawi chawi nawn tur chuan player damkim piah lamah BBC-in an ropuina ang kha an neihlet leh a ṭul ang - Last 16-a an hmachhawn tur hi Paris St-Germain an ni tlat.
Ronaldo leh penalty
Real tan Ronaldo-a'n penalty a chhuih luh chiah khan a senior career-a penalty a khung vawi 100-na a ni a, vawi hnih a chhuih luh avangin a career-a penalty aṭanga a goal khung ringawt hi goal 101 a tling tawh tihna a ni - kum 32 mi forward hian penalty a khung zinga 94 chu club tan a ni a, goal sarih hi ram tana a khung a ni thung.
Valencia-in Ronaldo an ngam lo laklawh a, league match-a vawi 10 an intawn hnuhnungah Ronaldo hian Valencia lamah goal 12 ngawt a khung tawh - Manchester United forward hlui hian season duhawm lo tak a hmang nia sawi ni ṭhin mah se a chetchhiat season-ah pawh goal 20 ngawt a khung leh der tawh! Real-a season kua a hman tawhah Ronaldo hian season tinin goal 20 aia tlem khung a la nei ngai lo!
Player faktu Zidane
Real Madrid boss Zinedine Zidane chuan hnehna an chan avanga a player-te fakin, "Hlim takin ka haw dawn a ni. Ka player-te khan inkhelh harsatna hmunah an khel ṭha em em a, lawmpuina hlan mai hi kan tih theih chu a ni. Hnehna kan sual chhuak a, kan tan chuan hei hi a pawimawh lai ber chu a ni," a ti.
French manager chuan, "Game kha uluk takin kan zir lawk a, hnehna kan chan avangin match khat khel tlem zawk mah ila an chungah kan awm ta. Chawlhlawk hman hnuah khan kan goalkeeper Keylor Navas khan hna a nei ve nual hman a, mah se inkhel pumpui thlir chuan chak hi kan phu a ni," tiin a phu zawk point thum nena an ṭin thu a sawi.