Liverpool an mualpho nawn
Jurgen Klopp-a kaihhruai Liverpool-in Inrinni zan khan West Brom 3-2 in an hneh lo a, FA Cup aṭangin an tla. Reds-in league hmahruaitu Manchester City an hneh hnuah Swansea City an hneh lo zui a, tun
ṭuma Baggies an hneh lohna hmun hi an kulhpui Anfield a ni.
Inrinni zan inkhelah Roberto Firmino hmangin Liverpool-in minute ngana lekah hma hruai mah se West Brom-in Jay Rodriguez goal hnih hmangin an chhang let a, Reds defender Joel Matip-a'n an lamah a tilut a, heng goal te hi first half-a lut vek a ni. Second half-ah Mohamed Salah-a'n Kop tan beiseina siam mah se replay tal khel tura an mamawh zat goal khat an khung belh theih loh avangin an tla.
VAR a langsar
FA Cup-ah video assistant referee (VAR) hman a ni a, Reds chak loh ṭum hian vawi thum hman a ni. Anfield-ah goal a lut hma a, minute ngana lekah Firmino-a'n tawih zetin West Brom keeper a pet khum a, amaherawhchu minute 11 a nih meuh chuan West Brom-in Rodriguez hmangin goal hnih an khung leh tawh.
Minute 19-naah VAR thutlukna hman a ni a, Reds lawmna siamtu a ni. Baggies defender Craig Dawson chuan corner aṭanga ball kal chu tauh lut mah se keeper Simon Mignolet tibuai tura dah midfielder Garry Barry chu a offside chiah chiah avangin pawm sak a ni lo.
Hemi hnu hian Baggies midfielder Jake Livermore chuan Salah a pawh tluk vangin penalty a chawi a, referee Craig Pawson chuan thutlukna siam turin VAR a ngai chang phawt. Reds duh dan ang takin VAR-in ro rel mah se Firmino-a'n penalty a hlah a, Liverpool-in an siphurh sut theihna hun ṭha an hlah.
First half injury time-ah Rodriguez-a ball pek chu Dawson-a'n hmun hlauhawmah takah pet lutin Matip a insiam ṭha hman lo a, Reds defender hian an lamah a tilut. Rodriquez chu offside anga ngaih a nih avangin VAR hmangin en nawn a ni a, amaherawhchu ennawn a nih hnuah West Brom goal hi pawm a ni.
Salah a dang
Reds mualpho mah se Mo Salah erawh a che ṭha chhunzawm zel a, an goal hmahruai khung tura Baggies defender Johny Evans a tlan pel chu a hmuhnawm tham hle. Hetah hian Egyptian forward hian duh tawk mai loin penalty a hlawh chhuak a, minute 78-naah goal a khung leh bawk.
Salah hian tun season Premier League-ah goal 18 a khung tawh a, FA Cup-a goal a khung leh tak avangin inelna hrang hranga Reds tana a goal khung zat chu goal 25 a ni.
Reds mawng a pawp
Liverpool-in an tlarhnung pawp an hria a, khawvel defender manto ber ni turin Southampton aṭangin Virgil van Dijk chu pound maktaduai 75-in an lalut a, a phui phah lo.
Reds hian relegation zone-a a awm Baggies an tum chungin first half-ah goal thum an chhuah. Real Madrid-in October 2014 khan Anfield-ah goal thum an khung a, hemi hnua first half-a Anfield-a goal thum khung leh hmasa ber chu West Brom an ni.
Liverpool hian April 2017 khan Anfield-ah Crystal Palace an hneh lo a, tun ṭum hi match 19 chhung an muala hneh loh an tawn loh hnua an chak loh lehna hmasa ber a ni.
Reds manager Jurgen Klopp chuan, "Tlarhnung chhiat vang a ni a, goal kan venhim ṭhat loh chhan chu thutlukna siam sual vang a ni. Dik taka sawi chuan chak an phu a ni," tiin an tlarhnung a pawp tih a zep lo.
Inkhel dang
FA Cup fourth round-ah beisei loh result a awm nual a, Premier League club West Ham United-in player 10-a khelin Wigan Athletic 2-0 in an hneh lo.
Will Grigg chuan 2013 FA Cup champion tan goal hnih a khung a, League One club hian minute 7-na lekah goal an khung tawh a, chak an phu zawkah a ngaih theih. Hammers wing back Arthur Masuaku chu minute 49-naah Wigan midfielder Nick Powell chil a chhak khum avangin hnawhchhuah a ni a, hemi hnu hian Wigan hian goal khat dang an khung belh.
Swansea City-in League two club Notts County khelmualah chak hmel an hmu thei lo a, 2-2 in an inhnehtawk. Huddersfield Town pawh an mualah Birmingham City nen 1-1 in an inhnehtawk a, Premier League kai thar hian replay an khelh a ngai dawn a ni.