Taekwondo-ah Mizoramin gold 6 la

1st National Open Poomsae Taekwondo Championship-ah Mizoram team chuan gold paruk leh silver pahnih an la a. Inelna hi Cuttuck, Odhisa-a neih a ni.

Asian Games 2018 leh Olympic 2020-ah Poomsae telh a nih dawn avangin Taekwondo Federation of India chuan ramchhungah poomsae chawikan a tum hle. Taekwondo Poomsae malkhaia ram pum huap inelna hmasa ber buatsaih a ni.

Inelnaah hian category hrang hrang cadet, sub junior, junior leh senior telh kim a ni a. Ram chhung aṭangin taekwondo poomsae thiam leh team hruaitu 400 chuang an tel. Mizoram aiawhte hi coach Robert Laltluangkima, manager C. Lalhmangaihzuali leh Lalruattluangi ten an hruai a, inelnaa match official ni turin Joseph Thansanga a kal bawk.

18th Asian Games Invitation Tour­nament chu Jakarta-ah February 10-15 hian neih a ni dawn a, Poomsae inelna huanga khel turin Venghlu tlangval Lalthlamuanpuia, Republic Vengthlang TC leh South Hlimen tlangval Lalfakzuala CMTC te chu India aiawh tura thlan an ni a. Tunah hian National Camp-ah an awm mek a ni.