F1 season neih ngei an tum ruh

Formula 1 season chu neih ngei an tum ruh hle, chief executive Chase Carey chuan F1 driver zingah coronavirus kai an awm palh a nih pawhin world championship neih tlang ngei an tum tih a sawi.

Tun hnai khan F1 hian season bul ṭan dan tura an ruahmanna chu an tarlang; July 5 hian a hmasa ber atan Austria ramah an tlan ang. Season pumpui an hman dan tur erawh an la ti chiang thei lo a, intlansiak hmasa pariat chu Europe khawmualpuiah vek neih a ni ang.

Car intlansiakna sang ber hi an tum dan chuan March thlatir khan Australian Grand Prix chu Melbourne-ah an tlan ang. Inelna neih ngei an tum hnuah McLaren team zinga mi chuan hri a kai tih hriat a ni a, chawpchilh takin an ṭhulh leh hnuhnawh.

American pa Carey chuan, "Mimal hri kai an awm a nih pawhin, an mahni ngaihthah vang ni loin inelna ṭhulh a ni dawn lo. Team zawng zawng an fimkhur em em a, tunah pawh hri laka an him theih nan theihtawp an chhuah vek.

"Team ṭhenkhat zingah inelna hmachhawn duh lo an awm a nih pawhin intlansiak chu kaltlang pui a ni dawn, driver zingah hri kai an awm a nih pawhin team tin hian an aiawh thei tur an nei vek," a ti.

Formula 1 hi a hmuna entu an awm dawn lo, season dangah chuan team pakhat hian inelna pakhat atan mihring 130 vel hruai ṭhin mah se kuminah erawh mi 80 vel chauh an kal ang.