IPL Auction 2018 Ben Stokes man a to ber

April 4 aṭanga khelh ṭan tur Indian Pre­mier League player hralh­chhuahna chu January 27 leh 28 khan neih a ni a, England all-rounder Ben Stokes chu Rajasthan Royals chuan vaibelchhe 12.50-a leiin player manto ber a ni.

Indian player zingah Jaydev Unadkat chu player manto ber a ni a, Twenty20-a hming chher tak Indian fast bowler hi Rajasthan Royals vek hian vaibelchhe 11.5-in an lei. Karnataka all-rounder Gowtham Krish­nappa chu nuai 20 aṭang lekin a man inṭan mah se Rajasthan club vek hian vaibelchhe 6.20-in an lei a, kum 29 mi all rounder hian a man let 31-a tam pawisa a hlawh chhuak!

Ni hnih chhunga pla­yer hralhchhuah zat hi an vaiin mi 169 an ni a, an zinga 56 chu ram­pawn player an ni. Player lei nana IPL club-te sum insen zat hi a vaia belhkhawm chuan vaibelchhe 431.7-a ni a, player langsar zingah Steven Smith, Virat Kohli leh AB de Villiers-te chu an club khelh meknain an chelh zingah an tel a, auction-ah hian an tel ve lo.

Nepal rawlthar duh­awm Sandeep Lami­chhane chuan IPL chan­chin a ziak danglam a, kum 17 mi bowler hi Delhi Daredevils chuan nuai 20-a leiin Nepalese cricketer zinga IPL contract hlawh chhuak thei hmasa ber a ni.