Zaninah Arsenal jersey nen Mkhitaryan?

Arsene Wenger-a'n Hen­rikh Mkhitaryan an lakluh hlimin Arse­nal tana khel turin a thiam tawk, tiin a sawi tawh a. Armenian interna­tional hian zanin dar 1:15 hian Premier League mawngphaha awm Swansea City a hmachhawn beisei a ni.

Champion lai Arsenal hi FA Cup aṭanga an tlak tawh avangin kar tawp khan match an khel lo a, an hmachhawn tur Wales club erawhin Inrinni zanah match an nei thung.

Alexis Sanchez a chhuah hnuah Wenger-a nauten match hnih khelin hnehna an chang a, midfielder Jack Wilshere leh Mesut Ozil te an khelh ṭhat avangin Chile international awm loh a la lang lo - anni thlawp tur hian Manchester United aṭangin Mkhitaryan an neih belh bawk.

Gunners manager Wenger chuan, "Hun rei tak cham turin Mkhitaryan kan lalut a, Ozil pawh a cham chhunzawm ngei ka beisei," tiin Mkhitaryan leh Ozil te chu khel dun tura ruahmanna an neih thu a sawi.

Kum 29 mi Mkhitaryan hian Bundesliga lamah a theihna san zia a pho chhuak tawh a, Manchester United tan pawh a khel chhe ngai lem lo. United manager Jose Mourinho-a'n a rin ngam loh hi Wenger-a'n a ring ngam a nih chuan inkhel thlak dang­lam thei tur khawpa theihna nei sang a ni.

North London club hian Mkhitaryan an lakluh hnu­ah Borussia Dortmund tana a khelh pui ṭhin Pierre-Emerick Aubameyang an rim chhunzawm mek zel.

Bundesliga top scorer lak tumin vawi hnih indawrna an nei tawh a, mahse hnawl sak an ni. Arsenal hian pound maktaduai 60 ve bawr an seng phal a nih chuan Gabon striker hi an chang thei dawn niin a lang.

Amaherawhchu, club pa­hnih hi sum fai ringawt chuan an inrem dawn lo niin a lang. Dortmund hian an striker chhuanvawr hi an chân a nih chuan Emirates Stadium aṭangin Olivier Giroud seng luh an duh ve thung. Gunners hian France striker hi an chhuah phal a nih chuan an Aubameyang lakluhna kawng a inhawng zau ang.