Player ven an ngai - Pep

Manchester City manager Pep Guardiola chuan player inhliam tam lutuk an pumpelh theih nan chuan referee ten player an ven uluk a ngaih thu a sawi chhuak.

Premier League hmahruaitu City hian Pathianni zan khan Kevin de Bruyne leh Raheem Sterling te goal hmangin Championship club Cardiff City 2-0 a hnehin, football inelna upa FA Cup fifth round an lut.

Cardiff City an hneh ṭum hian Leroy Sane chu Joe Ben­nett-a'n a kerek a hliâm sak a, Germany in­ternatonal Sane hi thla khat chhung vel a chawlh a ngai dawn a ni.

City manager Guardiola chuan, "Referee te hian player an venghim ṭha tur a ni, kei chauh ni loin player dang zawng zawng pawhin venhimna ṭha an mamawh. Sane hi chawlh kar hnih emaw kar thum emaw, thla khat hial pawh a chawlh a ngai mai thei," tiin a sawi.

Season kal laia City player pawi­mawh Sane hian league match-ah West Bromwich Al­bion, Burnley leh Leicester te a hmachhawn theih a rinawm loh a, February 13-a Bazel nen Cham­pions League last 16 an khelh hunah chuan inlan thei tura beisei a ni ang.

A la tawk lo
Spanish manager Pep kaih­hruaina hnuaiah City hian Premier League, Champions League, League Cup leh FA Cup nomawi an la beisei vek a, an tlarhnung thuam chak nan Athletic Bilbao defender Aymeric Laporte an lakluh belh leh dawn bawk.

City tlarhnung laiah John Stones leh Nicolas Otamendi te rinrawl an ni mek a, Vincent Kompany leh Eliaquim Mangala ten hliam an neih fo avangin an inlan tam lo. Guardiola-a'n tlarhnunga a player neih sa a la duhtawk lo a ni.

France defender Laporte hi kum 23 mi a ni a, ram tan Under 21 inelna huangah match 19 khel tawh mah se senior team tan a la inlan lo. Spanish club aṭanga defender lachhuak turin City hian pound maktaduai 57 an sen a ngai dawn a, club player manto ber a ni ang.

English club hian 2015 khan pound maktaduai 55-in Kevin de Bruyne an lei tawh a, Belgium international midfielder hi an club player manto ber a ni mek. Laporte an lalut leh a nih chuan City hian nikum nipui leh tun thlasik transfer chhungin defender lei nan pound maktaduai 190 an seng tling chiah dawn a ni.