Blues tan Batshuayi inlar

Chelsea manager Antonio Conte chuan Newcastle laka goal hnih khungtu Michy Batshuayi chu player naupang deuh la ni mah se theihna nei sang tak a nih thu a sawi.

Pathianni zan FA Cup fourth round inkhelah Blues hian kum 24 mi Batshuayi goal hnih bakah, defender Marcos Alonso freekick chhuih luh hmangin Newcastle chu 3-0 in an sawp.

Blues manager Conte chuan, "Batshuayi hian tharum a ngah hle, a theihna a sangin goal a khung hian inrintawkna a siamsak ngei ang. Striker tan chuan goal khung hi a pawimawh a, a khelh ṭhat ber ṭum a ni em chu ka hre lo nain team tan chuan lawmna tur a siam," a ti.

Italian manager Conte-a'n nipui laia a lakluh Alvaro Morata chu hliam vangin a chhawr an la thei lo a, striker dang nena sawi zawm an nih laia an neih sa Batshuayi a rawn cheṭha hi chanchin lawmawm a ni ang.

Chelsea player zingah Morata leh Eden Hazard te chiah season kal laia goal 10 khung tling thei an ni a, Belgium international Batshuayi hian goal 10 a khung tling ve ta chiah.

Conte chuan, "Player dang kan lalut a nih pawhin Michy hi loan hmangin a chhuak dawn tihna a ni kher lo. A chhuak duh a ni emaw, a cham duh a nih pawhin ama thu a ni," tiin a sawi.

Premier League cham­pion Chelsea hi tun din­hmunah pathumna an ni mek a, Nilaini zan hian Bour­nemouth an mikhual ang.