Coutinho telna Barca an chak

Pound maktaduai 142 man Philippe Coutinho-a'n Barcelona tana a league match hmasa ber a khel a, Catalan club hian hnehna an chang–an mikhual Alaves chu 2-1 in an hneh a, La Liga-ah hmahruaitu dinhmun an luah chhunzawm zel.

Pathianni zan inkhel dangah Atletico Madrid chuan Antoine Griezmann, Fernando Torres leh Thomas Partey goal khung hmangin Las Palmas chu 3-0 in an hneh ve bawk a, Barcelona hnaih bertu dinhmun an luah mek–hmahruaitu Barca nena an inthlauhna hi point 11 a ni!

Suarez & Messi
Nou Camp-ah Barcelona-in awlsam taka hnehna chang tura beisei an ni a, beisei ang ngawt erawh a ni lo–Manchester City forward hlui John Guidetti chuan Barca keeper Marc-Andre ter Stegen a bum hnuah goal hmahruai a khung a, minute 23-na lekah Barca an hawihai.

Goal a luh loh reng hnu minute 72-naah Luis Suarez-a'n an si phurh a sut ve chauh a, Suarez goal khung hma hian Lionel Messi-a freekick chu Alaves keeper Fernando Pacheco-a'n ṭha zetin a dan sak mah se minute 84-naah erawh Argentine forward hi a dang nawn lo; 2-1 in Barca an chak.

Barca tan midfielder Paulinho-a pet goal tur nia ngaih chu line aṭanga petchhuah a ni a, Coutinho-a'n a chance neih goal zawnah a pet lo bawk. Alaves-in chakna chance nei lo an ni bik lo–goal hmahruai an khung hnuah Ruben Sobrino-a'n a chance neih a chhawr lo a, Ruben Duarte pet goal tur nia ngaih chu Gerard Pique chuan a lo dang hman bawk.

Valverde & record
Barcelona-in La Liga match 21 an khelh tawhah tlawm hmel an la hmu lo a, Catalan hian coach Ernesto Valverde hnuaiah club record dinglai an nihrual–kum 2009-10 a Barca an champion ṭum khan Pep Guardiola enkawlna hnuaia an league match hmasa 21-ah tlawm hmel an hmu lo a, league match hmasaa chak tluang rei ber club record an siam.

Result pumpui thlir chuan Pep-a naute record aiin Valverde hnuaia Barca record hi a la ropui zawk cheu–Pep-a hnuaiah khan Barca hian an league match hmasa 21-ah vawi 17 hnehna an chang a, vawi li draw result an nei.

Valverde hoin Barca hian vawi 18 hnehna an chang a, vawi thum an khingpui an inhnehtawkpui–Catalan club hian tun kar tawpa Espanyol an lenchilh hunah an chak emaw draw result ringawt an hlawh chhuak a nih pawhin club record an siam dawn tihna a ni.

Suarez & Coutinho
Coutinho ang bawka Liverpool aṭanga Barca pantu Suarez chuan an player thar a fak. Uruguayan striker chuan, "Nou Camp-a league match hmasa ber khelh chu thil harsa tak a ni. Mahse, Philippe khan a khel ṭha a, team tan a thawhhlawk em em a ni," a ti.

Brazil international Coutinho hian Catalan club tana a match hmasa ber chu kar hmasa khan Espanyol lakah a lo khel tawh a, minute 20 a la awm tihin tlan luhtir a ni. Pathianni zana inkhel hi league match bika a inlan hmasak ber a ni a, inkhel bul ṭantir ni mah se minute 66-naah striker Paco Alcacer chuan a thlak.

Valverde chuan, "Player-te hi khawl ang maia an match khatna aṭanga hna thawk nghal pup pup tura beisei tur an ni lo. Coutinho khan a khel ṭha a, ball chan duhin a tuihal a ni. Match hmasa berah 20 min hun a hmang a, tunah a khel hnem leh hret–zawi zawiin hma a sawn zel ang," a ti.

Valverde & Iniesta
Barcelona coach Ernesto Valverde chuan, "Player ṭha tak tak kan ngah em em a, Iniesta hi chu 'master' a ni. Alaves box chhungah kan vaia awm chi a ni lo a, counter attack hmangin min nawr let thei reng. Chutianga hmun awl zawng zawng lo hnawh khat zung zung tur chuan Leo nen hian an ṭha ber a, si phurh kan sut theih nana a che vel kha a hmuhnawm hle a ni," a ti.

Barca si phurh sutna goal kha Suarez-a khung ni mah se Iniesta siamsak a ni a, Valverde-a'n a player chuam hahipa a fak hi a mak lo. Alaves lamin penalty hlawh chhuak ngei tura an inngaihnaah an hlawh chhuak lo a, Valverde erawhin referee a sawisel duh lo.

Spanish coach chuan, "A chang chuan kan pet goal ngei pawh pawm sak kan nih loh chang a awm. Football-ah chuan inhnial buaina hi a awm fo a, a chang chuan in tana ṭha turin a thleng a, a chang chuan vanduaina a ni thung," tiin match official laka vuivaina awm ṭhin chu game-in a ken tel a nih thu a sawi.