Ozil leh Adidas inkar a tawp?

Arsenal playmaker Mesut Ozil chu nipui a lo thlen hunah, sumdawnna lama pound maktaduai 22 zeta a thawhpui Adidas nen an in mangṭha dawn niin German chanchinbu lian Bild chuan a tarlang.

Germany international hlui hi tun hma angin khelmual chhung leh pawnah a chefuh hleithei rih lo. Ram tan inkhelh a chawlhsan tawh a, Turkey president Recep Tayyip Erdogan nen an thlalak a darh avangin a hming chhe bawk.

Car manto siamtu Mercedes chuan an thawhdunna an lo tihtawp san tawh bawk, tunah chuan kum sarih chhung a lo thawhpui tawh Adidas nen pawh an inṭhen leh dawn ta niin a lang.

Kum 31 mi Ozil hian Gunners-ah hian kar khatah £350,000 a hlawh mek a, club player hlawh hnem ber a la ni. North London club-ah hian Unai Emery hunlai khan hnawl a ni a, manager thar Mikel Arteta kaihhruaina hnuaiah beiseina a nei thar leh mek.

Premier League season kal laiah Ozil-a'n league match 18 a khel tawh, inelna hrang hrangah match 23 khel tawhin goal khat a khung. Football an khelh chhunzawm leh hunah Gunners tan rinrawl a ni chhunzawm tura ngaih a ni.