A chung berah Napoli

Napoli chuan Dries Mertens-a goal hnih hmanga Bologna 3-1 a hnehin Serie A hmahruaitu an ni leh ta. Inkhel dangah season hmasa pahnihna AS Roma erawh Sampdoria lakah si khat faiin a tlawm.

Pathianni zan inkhelah mikhual Bologna lamin second 24-na lekah Argentine forward Rodrigo Palacio-a goal hmangin hma an hruai a, mahse Ibrahima Mbaye-a'n an mahni lamah a tih luh bakah Belgium forward Mertens chuan goal hnih a khung zui bawk.

Kum 30 mi Mertens hian season kal laiah league goal 13 a khung tawh a, match 22 khelhah point 57 hmuin champion lai Juventus aiin point khatin an sang zawk a, hmahruaitu an ni.

Maurizio Sarri enkawl Napoli hi nikum December 1 khan Juventus lakah an tlawm a, Turin club an hneh loh hnu hian league bikah chak loh an nei tawh lo–tun hnaiah a zawnin match ruk chhung hnehna an chang thei.

Napoli hian kum 1990 khan Serie A nomawi an chawi a, Italian champion an nih laia an thiampuipa chu Diego Maradona a ni. Argentine legend liam hnuah hlawhtlinna lian an la chang leh lo a, tun season hi beisei an neih san ṭum a ni.

Inkhel dangah Roma chu an mikhual Sampdoria lakah 1-0 in an tlawm, inkhela goal awmchhun hi minute 80-na a Colombia forward Duvan Zapata khung a ni.

Roma hian tun hnaiah league match sarih chhung chak ni hmel an hmu thei ta lo a, league hmahruaitu Napoli aiin point 16 zetin an hniam zawk; table-ah pangana an ni mek.

Season tir lama cheṭha tak Inter Milan an che fuh thei rih lo, Luciano Spalletti naute hi Spal nen 1-1 in an inhnehtawk a, nikum December 3 hnulamah hnehna an la chang leh lo a ni. Inter an chak loh lai hian AC Milan erawh Lazio lakah 2-1 in an chak ve thung.