MSL 4 kan nghak chuak ta. Vikings hmachhawn tur Tuikual South
Mizoram Super League season lina chu zanin aṭangin Hawla Indoor Stadium, Republic Vengthlangah khelh ṭan a ni dawn a, dar 7:30 hian champion lai Mission Veng Vikings leh Tuikual South ten match hmasa ber an khel ang; tualchhung basketball ngaina tute tan inkhel hmunawm a awm nghal dawn.
Club pahnihte hi season hmasa khan semifinal-ah an intawng a, Vikings hian Ronald March Jr hoin hnehna an chang a, final-ah vawi hnih champion tawh Khatla TBL hnehin nomawi an chawi zui. Fans nei ṭha veng pahnih inkhel hi Zonet TV chuan live-in an pe chhuak ang.
Tun season MSL-ah hian team paruk–Mission Veng Vikings, Khatla TBL, Tuikual South, Zarkawt BCA, Mission Vengthlang Hollow leh Republic VR4 te an inel dawn. Vikings chiah hi state pawn player ziak lut an ni. State pawn player hi quarter khatah pakhat chiah chhawr theih a ni dawn.
March tel loin
MSL hmasa lama Vikings-in nomawi an chawi theihna chhan lian tak chu March-a a ni, mahse American tlangval hi zanin hian a la inlan dawn lo. Tualchhung player langsar Lalrina Renthlei-in Zarkawt BCA a zawm san bawk avangin Vikings hi season hmasa anga team ṭha chu an la ni lo mai thei.
Vikings manager H. Lalhruaitluanga chuan, "Ronald March Jr a la inlan dawn lo, a rawn thlen hun tur tak a la chiang lo," tiin Vanglaini a hrilh. Hruaia hian Lalrina Renthlei chu player ṭha bik a nih avangin a hmun ruak luahkhah a harsat tur thu a sawi a, mahse club dang player a nih tawh avangin a tel loa khelh dan an thiam tawh thu a sawi bawk.
Champion lai Vikings hian nikum November 21 aṭang khan inbuatsaihna an nei ṭan tawh a, MSL sulhnu nei ṭha Michael F. Lalawmpuia, Lalruatkima Sailo leh captain Moses Zoremmawia an la neih avangin team ṭha leh hlauhawm chu an la nih phak a rinawm.
Mission Veng tlangval Hruaia chuan, "MSL chinah chuan team chhia an awm tawh lo, eng team pawh hmachhawn thei turin kan inpeih. Senior National Championship khel zo hlim kan ni a, kan naute hi an chau tlang, nghawng a nei dawn em tih chu ka sawi lawk thei lo," tiin a sawi.
TKS an zam lo
Tuikual South coach KC Lalliantluanga chuan, "Vikings hi champion lai an ni a, mahse March a awm loh chuan team pangngai ve mai an ni, kan huphurh lo," tiin Vanglaini a hrilh. Nikuma an hneh loh lakah phuba lak tumin an thawk chhuak dawn.
Basketball ngaina veng Tuikual South hi MSL-ah team ṭha berte zinga mi ni mah se nomawi an la chawi lo. Tun season-ah champion tumin hma an la a, inbuatsaih nan Lunglei leh Kolasib-ah tour an nei.
Captain Zodinthara Fanai hoin an inlan leh dawn a, MS Dawngzela leh Lalrohlua te awm tawh lo mah se, an aiawh turin Lalnunpuia Renthlei leh Hlimpuia te an neih belh thung; an khingpui tur Vikings ang bawkin November thla aṭangin training an nei tawh a, season dang ang bawkin an fitness a ṭha hle tura ngaih a ni.
MSSC hnuaia coach ni bawk KC Lalliantluanga chuan, "Kan inbuatsaihna a ṭha, kan duh ang tawkin court hmu thei lo mah ila a remchan ni chuan nikhatah vawi hnihte kan practice ṭhin," a ti. KC-a hian MSL4 atan hian player bakah club thuneitu lam an thawhrim thu a sawi bawk.