MFA Futsal League : Veng 6 tan hmun ruak 3

RFL Plastics MFA Futsal League group A aṭanga quarterfinal lut tur chu zanin hian a chiang dawn a, R. Dengṭhuama Multipurpose Hall, Mualpuiah futsal lama tuite an fuan khawm ang.

Chanmari-in an khingpui an la hneh vek a, group A aṭangin quarterfinal an luh tawh bakah hmahruaitu an ni chiang tawh.

Table mawngphaha awm Kanan erawhin point khat chauh an la hmuh avangin Division One-ah an relegate tawh. Club dang paruk Chhinga Veng, Dawrpui, Bawngkawn, Electric Veng, Saron Veng leh Bungkawn-te erawhin semifinal lut turin beiseina an la nei vek.

Futsal League-ah hian point inang team hnih an awm a nih chuan head to head en tur a ni a, pahnih aia tam an nih erawh chuan table pumpuia goal difference en tur a ni thung ang.

Match hmasa bera Chanmari leh Bawngkawn te inkhel aṭanga a hnu lama inkhel tur Dawrpui Veng vs Saron Veng, Chhinga Veng vs Bungkawn leh Electric Veng vs Kanan Veng te a pawimawh vek.

Thil thleng thei a tam avangin a ngaihnawm bik chauh thlur chhuak ila.

Point 9 vek: Bawngkawn leh Chanmari an inhnehtawk a, Saron Vengin Dawrpui Veng a hneh a, Electric Veng leh Kanan an inhnehtawk chuan Bawngkawn, Dawrpui leh Electric Veng ten point 9 vek an hmu dawn.

Chhinga Vengin Bungkawn lakah point an hlawh chhuah bawk chuan team pathum zinga pakhat hi an tling dawn a, a pumpui goal difference en tur a nih dawn avangin Bawngkawn chu palina niin an tling ang. Chutihrualin a chung result pathum hi a thlen a, Bungkawnin Chhinga Veng an hneh thung chuan Chanmari leh Chhinga Veng hnung zuiin Saron Veng leh Bungkawn an tling daih thei a ni.

Point 10 vek: Bungkawnin Chhinga Veng an hneh a, Saron Vengin Dawrpui an hneh bawk chuan Chhinga Veng, Saron Veng leh Bungkawn ten point 10 vek an hmu dawn. Heng team pathum quota neih zat hi Chanmari vs Bawngkawn bakah Electric Veng vs Kanan Veng inkhel result-in a hril ang.

Thil thleng tur sawi chian vek sen a ni lo a, chiang taka hriat theih chhun chu inkhel a pawimawh vek avangin match hnuhnung ber thlengin a hmuhnawm ang.