East Bengal vs Minerva Punjab Vawiinah I League champion zawnna?
Minerva Punjab-in I League-ah hma an hruai mek a, champion tum East Bengal-in an thlauhna chu point ruk a ni–team pahnih hi vawiin chawhnu dar 2:00-ah an inhmachhawn dawn a, champion zawnna ang hiala chhal theih a ni.
East Bengal hian Minerva aiin match khatin an khel tam zawk a, mah se Punjab club hi match hnih an la hmachhawn dawn avangin an hneh ve ve chuan Kolkata club tan champion kalkawng zau takin a la inhawng–Khalid Jamil-a'n Aizawl FC-ah a hming a chher tawh a, East Bengal-ah Mizo club tana a hlawhtlinna kha vanneih vang a ni lo tih lantir a duh ang.
Zaninah Churchill Brothers an inlan dawn bawk a, Goa club hian zan dar 8:00-ah Minerva laka tlawm hlim Neroca an mikhual dawn a ni.
Jamil a buai!
Player a nih lai aṭang tawhin Khalid Jamil-a 'cool' na chu sawi hlawh a ni ṭhin a, hei hi coach a nih hnu thleng pawhin a chhawm. Season hmasaa Aizawl FC a champion puina kawngah pawh boruak sang kara a 'cool' reng theihna chu fak a hlawhna a ni a, a player-te leh ama tan pressure siam a duh lo.
Mahse, tun season-ah erawh Indian coach awm tawh zinga hlawh hnem ber hian Kolkata club lian enkawlin a ken tel 'pressure' a zo lo niin a lang–kar hmasa Thawhlehni khan club training-naah journalist pakhat chu ṭawngkam mawi lo takin a an khum a, club thuneitute an inrawlh a ngai hial!
Boruak chu
Jamil-a'n a hnuah he journalist hi ngaihdam a dil a, Thawhlehnia club training chhimtu fan-te chuan coach Khalid Jamil, club thuneitu zinga mi Alvito D'Cunha leh goalkeeper Luis Barreto duh lohna thu an au pui!
Mahse, Khalid hian a hnuah fan-te hi titi puina a nei a, I League nomawi chawi theihna chance an la neih san thu a hrilh! East Bengal hian kum 14 chhung league nomawi an chawi lo tawh a, fan-ten nomawi chawi loa season khar leh an duh tawh lo–vawiinah Jamil-a tan pressure a na lehzual dawn tihna a ni.
Hahdamna?
East Bengal hian an match hnuhnung panga aṭangin point ruk chiah an hlawh chhuak thei a, Khalid-a lak aṭangin hei hi an beisei lo. Kolkata club hian harhna an chan theih beiseiin India international hlui Manoranjan Bhattacharya chu technical advisor atan an lalut a, Khalid a phur rit lutuk tur a zan sawt beisei a ni.
Kolkata club hian an striker beisei phak lo Willis Plaza chu an chhuah zalen tawh a, a thlak turin Mohun Bagan lamin an chhuah tak Ansumana Kromah an dawr! Liberian midfielder hi Inrinni leh Pathianni khan trial neih tir a ni a, coach Khalid leh technical advisor thar Manoranjan te mit a tlun chuan Kolkata club hian an lalut ang–East Bengal fans aṭangin duh lohna thawm erawh a ri ring a, he thu buatsaih lai thleng hi chuan Kolkata club thutlukna kan hre hman lo.
Minerva an ṭha
I League hmahruaitu an nih miau avangin Minerva Punjab an ṭha tih hai rual a ni lo a, East Bengal tan hneh tur chuan an ṭhat theih dan bera an khelh a ṭul ang. Minerva-in anmahni chherchhuah player an hmang nasa a, anni pui tura an neih an foreign player-ten an khel ṭha ṭhin bawk.
Bhutanese forward Chencho Gyeltshen-a'n player ṭha a nihzia pholangin I League-ah goal nga a khung tawh a, Middlesbrough midfielder hlui William Opoku pawh en bik tlak khawpa player hmuhnawm a ni–hliam vanga Mahmoud Al Amna chhawr thei lo tur East Bengal tan anni pahnih hi ven bik an ṭul ang.