City vangin Liverpool an buai lo

Liverpool manager Jurgen Klopp chuan Manchester City kaltluang lai an tihtawp hnuah a player-ten game dangah rilru an pe tawk lo nia sawi chu a pha a, a zawna Swansea City leh West Brom an hneh loh chu City laka an chak result nen a inkungkaih loh thu a sawi.

Reds hian Premier League-a tlawm hmel hmu loa kaltluang Manchester City chu 4-3 in Anfield-ah an hneh a, anmahni faktute chil per pawh a hul hmain Swansea leh West Brom a zawnin an hneh lo lehnghal–hei hi football expert ṭhenkhat chuan City laka an chak avang khan Reds player-ten thei ta lua a an ingngaih vang a ni, tiin an puh.

Mahse, Klopp chuan, "Nitin training-naah ka player te an inthlahdah phah ka hmu lo a, City kan hneh vanga puh hi chu a dik lo. Game-ah kan rilru zawng zawng kan pe a, City kan hneh avang khan kan talbuai lo. Game hnih a zawnin kan tlawm ngei a, tuna kan tih theih chhun chu tun aia ṭha zawka khelh a ni," a ti.

Liverpool hian Premier League-ah palina dinhmun an la luah mek a, an hnuai chiaha awm Tottenham Hotspur aia point hniha la sangin match 14 khelh tur an la nei.

Klopp chuan, "Game tam tak khelh tur kan la nei a, chona phurawm tak takin min la hmuah avangin kan inpeih a ngai a ni. Hnehna chang lo mah ila, inzir phah nan kan hman chuan tlem talin a hlawk a, inzir nan kan hman loh phei chuan tihngaihna a awm lo," tiin a naute chu an tihsual aṭangin inzir se a duh thu a sawi.

German coach chuan pressure a sang sawt tih pawh pha loin, "Ni e, vawi hnih a zawna tlawm chuan pressure a sang sawt lo thei lo a, mah se he pressure hi keimahni insiam a ni tih kan hre tur a ni," a ti–Reds hian zanin dar 1:30-ah league match khel turin Huddersfield an lenchilh dawn a, fan-ten chak an duh ang.