Friendly match khelh an phal dawn

Premier League thuneituten inelna ṭan hmain club-te khuahkhirhna hnuaiah friendly match khelh an phalsak dawn. Inelna hi June 17-a khelh ṭan turin ruahmanna siam a ni.

Premier League-ah match 92 khelh tur a la awm a, club paliin match khatin an la khel tlem. Manchester City vs Arsenal leh Aston Villa vs Sheffield United te chu club khel tlem palite an ni a, heng inkhel hmang hian bul ṭan an tum.

Season tluanin club-ten inelna sang tak an hmachhawn a, inelna a zawh meuh chuan hahdamna hun ṭha an nei ṭhin. Club liana khel footballer-te hi 'millionaire' rual an ni a, chawlh lai hian chhungkua emaw kawppuite nen emaw nen an zinkual nasa ṭhin hle.

Chelsea-in 2014-15 season an champion khan Jose Mourinho-a'n player-te chungah rinna a nghat a, lawmthu sawi nan chawlh a pe rei. Amaherawhchu player pawimawh ten chawlh laia an taksa an vawn uluk tawk loh avangin season ṭan hmain ngai an awh hman lo a, khawvel coach ṭha zinga mi Mourinho meuh pawh 2015–16 season-ah chuan Krismas hmain a hna a chan phahah a ngaih theih.

Tun ṭumah pawh hian inelna la zo lo mah se March 13 aṭangin Premier League khelh chhunzawm theih a ni lo a, thla thum vel an chawl dawn tihna a ni. Hemi a nih avangin club-tinin combination nei leh turin training ṭha an mamawh a, an thil zir angte a taka hmang thei turin friendly match neih hi tih makmawh a ni.

Premier League hmahruaitu  Liverpool chuan Thawhṭanni khan player 11-in Anfield-ah match an khel a, hei erawh team leh team inkar a ni. Friendly match-ah hian club dang a hmachhawn theih dawn a, stadium emaw training  ground emawah an khel dawn. Amaherawhchu dan zawm ngai a awm thung.

•    Club-te chu inkhel turin minute 90 chhunga thlen phak loh hmunah chuan zin phal an ni dawn lo. Chutihrualin Newcastle United erawh an awmna Tyne and Wear-ah club lian dang an awm loh avangin hmun hla zawka zin an phalsak 

thei ang.

•    Player-te chu anmahni lirtheiin an kal tur a ni a, an thawmhnaw hak tur pawh an in ken ang.

•    Official referee hman phal a ni dawn lo a, coaching staff zinga miin inkhel enkawl (referee hna) hna an thawk ang.

•    Inkhelh hmain stadium emaw training ground emaw endik hmasak vek a ni ang.

Premier League club ṭhahnem takin friendly match neih pui atan Championship club an dawr a,  English Football League-in tun kar hian Championship club tan friendly match nei tura dan zawm ngai an ti chhuak ang.

United Kingdom sorkar chuan 2019-20 season khelh chhunzawm tura Premier League-in June 17 a rawt chu a pawmpui a, dan zawm tur erawh a tam thung. Tuna an dan hman mek lai hi 'Stage Two' a ni a, hetah hian training-naa intawh fuh a rem tawh.

Inelna ṭan tur chuan 'Stage Three' dan an zawm a ngai dawn a, hemi dan zawm chung hian June 1 aṭangin entu awm loin infiamna hrang hrangah inelna neih theih a ni ang.