Alexis hoin United-in Spurs tlawh dawn

Manchester United-in zanin dar 1:30 hian Tottenhan Hotspur hmachhawn turin Wembley Stadium an tlawh dawn. Alexis Sanchez-a'n United kawr nena Premier League a khelh hmasak berna tur a nih dawn avangin inkhel hian ngaihven a hlawh ang.

United an dam
United player zingah Eric Bailly leh Zlatan Ibrahimovic te chiah inhliam an awm tawh a, anni pahnih erawh khelmuala inlan turin hun rei zawk an la mamawh dawn. Jose Mourinho chuan, "Player inhliam an tam hi chuan ngaihtuahna a buai a, chutiang chiah chuan chhawr theih tura an han awm ṭhiau a, theihna sang tak an nih vek hi chuan buaina dang a awm, hei erawh a ṭha lam a ni," tiin a player neih danah a lungawi thu a sawi.

Portuguese manager tana lawmna belhchhah turin Alexis Sanchez chu chhawr theihin a awm dawn a, Chilean forward hian United tana an khelh hmasak berah man of the match lawmman a dawng nghal.

Alexis leh midang
United-in FA Cup-a Yeovil Town an hneh ṭumin Alexis hi goal hmasa pahnihah a inrawlh a, 4-0 in an chak zui bawk. Amaherawhchu, League Two club an hneh ṭum hian Burnley hnehtu aṭangin Juan Mata chiahin inkhel bul a ṭan dawn a, zanina Portuguese manager-in player a rem dan tur hriatthiam a har phah hle.

Alexis-a'n beisei aia hmain inkhel bul a ṭan a, Spurs nen pawh a ṭan nawn beisei a ni. Chilean forward thlawp tur hian league match hnuhnung pathuma goal la khung vek French forward Anthony Martial leh Yeovil nena goal khungtu Romelu Lukaku nen inkhel bul an ṭan a rinawm.

Tun hnaia an chet dan thlir chuan Jesse Lingard hming lam hmaih a thiang lo. United academy chhuak Lingard hian Wembley Stadium-ah record ṭha tak a nei - FA Cup leh EFL Cup final bakah Community Shield-ah goal a khung tawh a, inkhel bul ṭan thei a ni.

Mipui thlir rawn tur erawh jersey number 7 hatu Alexis a ni dawn a, Yeovil leh United an inthlauh deuh avangin Tottenham Hotspur hi Chilean forward fiahna inṭanna tur a ni.

United vul lai
Manchester United hian hma­hruaitu leh an hmelma Manchester City chu point 12 zetin la pha lo mah se Alexis an chan zawk avangin an ṭhenawm club ai hian khelmual pawnah an hawi sang rih a, khelmual chhungah pawh match nga chhung an chak zawn tawh a, kuminah an khingpui an la hneh vek.

Mourinho chuan, "January-a match nga kan khelh tawhah kan la chak vek a, Premier League match thum leh cup match pa­hniha hnehna chan hi a ṭha a ni. Goal khung a, hnehna chan hi a pawimawh a, goal kan chhuah loh bawk avangin position tinah player a inkhai rual hle," tiin a sawi.

Portuguese manager hian Wembley Sta_dium-ah record ṭha tak a nei a, United hi EFL Cup leh Community Shield-ah a chakpui tawh. Amaherawhchu heng inkhel pahnihah chuan England national sta­dium hi neutral ground a ni a, tun ṭumah erawh Spurs khelmual a ni ang.

Mourinho chuan, "Tottenham leh Chelsea inkhelh ṭum khan Wembley Stadium-ah khan ka awm a, Spurs ṭantu an tam avangin tunah chuan an khelmual anga sawi theih a ni tawh. Chubakah Spurs hi team ṭha tak an ni a, point an la hmuh tlem avangin champion beiseiawm tawh lo mah se Champions League khel thei tur zinga mi an ni. Player leh manager ṭha tak an nei a, kan point aṭanga thlir loa a nihna tak en chuan kan intluk tawk a, inkhel hmuhnawm tak a ni thei ang," tiin an khingpui tur a fak.

Kane a telna
Manchester United-in Alexis an nei a, Tottenham-in Premier League-a goal khung tam ber Harry Kane an kawl thung. English striker hian tun season hian league-ah ringawt goal 21 a khung tawh a, season li chhung chu goal 20 a khung tling ziah.

Spurs tana thu lawmawm chu damlohna vanga Southampton leh Newport County te hmachhawn thei lo Christian Eriksen a rawn kir theih a rinawm a, Danish midfielder tel lo hian Mauricio Pochettino hote an chak zo lo ve ve. Eriksen-a khelh ṭuma Spurs match hnuhnung berah erawh Poch-a hote hian Everton 4-0 in an hneh a, Danish midfielder hian goal a khung bawk.

Kum 25 mi Eriksen-a telna Spurs an danglam a, chutihrualin season ṭantira player lak nana sum hmang tlem Pochettino hote hian tun season-ah sum hmang tam zawk club an tluk lo. Tottenham hian insiam ṭhat tumin Paris St-Ger­main aṭangin Lucas Moura an lalut dawn niin a lang a, amah­erawhchu Brazil winger hian Uni­ted a hmachhawn hman dawn lo.

French club leh English club te hi Moura chungchangah hian pound maktaduai 25-in an inrem tawh a, Ligue 1 club tan match 229 khelin goal 46 a khung bakah assist vawi 50 a nei thei a, tun season-ah erawh PSG-in Neymar leh Kylian Mbappe te an neih tawh avangin subsitute aṭangin vawi ruk chauh a inlan.

Eng pawh chu ni se zaninah Moura chhawr theih a la ni dawn lo a, Argentine manager Pochettino-a'n a kawl sa player aṭangin point thum hlawhchhuah a tum dawn a ni.