Beckham-a'n Miami tlangzarh ta

England captain David Beckham chuan hun rei tak chhung a lo buaipui tawh, Major League Soccer team a neih tur chu a puangzar ta - a team tur hian hming an la nei lo a, Miami chu an innghahna tur hmun a ni ang.

Manchester United mid­fielder hlui Beckham chuan, "He khawpui nuam taka team ṭha tak kan din thei hi ka lawm a, zinkawng hlimawm tak ava ni em," tiin MLS player aṭanga club neitu a ni thei chu a lawm thu a sawi.

Beckham hian kum 2007 khan Real Madrid aṭangin MLS club LA Ga­laxy a zawm a, a con­tract-ah hian kum 2014-a MLS club neih theihna tur a tel. Beckham chuan, "Real Madrid aṭangin a hunlaia league la puitling lo tak ka pan a, thutlukna huaisen thlak tak a ni,"

"Chona hautak em em, mah se phurawm tak si ka hmachhawn dawn tih kha ka hria. MLS commissioner Don Garber nen kan inbia a, an hmachhawpte min hrilh khan a ni khat ni aṭangin min hmin nghal a ni," a ti.

England tana vawi 115 inlan thei Beckham hian kum 2013 khan inkhelh a chawlhsan a, Paris St-Germain aṭanga inkhelh a chawlhsan hnu kumah Miami hi a club neihna tur hmun atan a thlang a, mipui 25,000 lenna stadium-ah an khel ang.

Miami club-ah hian Beck­ham chauh neitu a ni lo a, Spice Girls manager hlui Simon Fuller, Bolivian-Ame­rican sumdawng hau­sa Marcelo Claure, South Florida lam chhuak sum­dawng Jorge leh Jose Mas bakah Japanese sumdawng hausa tawntaw Masayoshi Son te nen an thawkho.