Cahill-a'n Conte hma hun a hre lo

Chelsea captain Gary Cahill chuan tun hnaia chhuak tur anga sawi thawm awm reng an coach Antonio Conte hmalam hun a hriatpui loh thu a sawi.

Premier League-a a season hmasa bera Chelsea champion pui thei Conte hi club thu­neitute nen transfer bazar-a an player lakluh duh danah an inmil lo nia sawi a awm a, Italy lama kir leh ngei a tum thu lo sawi tawh ṭhintu Conte hi chhuak tur anga sawi thawm a ri ring hle.

Cahill chuan player lamin engmah an hriat ve loh thu sawiin, "Manager leh board inkar thu a ni a, keini lam chuan engmah kan hre ve lo. Keini chuan theihtawp chhuahin kan khelh chhunzawm zel a, club leh coach tan theihtawp kan chhuah reng a ni. Chu chu thil nihdan tur pawh a ni," a ti.

Blues captain chuan Conte fak nghalin, "Chelsea hi club hlawhtling tak a ni a, Conte hi manager ṭha tak a ni bawk. Coach tawnhriat ngah tak a ni a, ti tura min tih apiang tih kan tum mai ṭhin," a ti a, an thawhhona ṭha avanga result ṭha an neih ṭhin thu a sawi bawk.

Juventus boss hlui Conte chuan Chelsea-ah a hlim thu sawi ve bawkin, "Ka player-te nen hian kan thawkho zel thei a nih chuan ka lawm khawp ang. Nitina he hna thawk tura inbuatsaih te hi nuam ka ti em em a ni," a ti.

Chelsea hian zanin dar 1:15-ah Bourne­mouth an mikhual dawn a, January 17 hnua hrem leh hliam vanga inlan tawh lo Alvaro Morata chuan training a zawm leh tawh.

Conte chuan, "Cherries hmachhawn tur hian a dam hman ang," tiin a striker chung­chang hi a sawi a, Spanish striker hian club training a zawm leh tawh.