Man City defender thar Laporte

Manchester City chuan tlarhnung thuam ṭhat hna thawk chhunzawmin Aymeric Laporte chu Athletic Bilbao aṭangin an lalut. English club hian French defender Laporte buyout clause pound maktaduai 57 pek an inhuam miau avangin La Liga club tan chelh ngaihna a awm lo.

Kum 23 mi defender hian nizan khan City-ah kum nga leh a chanve chhung khel turin contract a ziak a, jersey number 14 a ha ang.

French defender hian Bilbao ṭantu hnenah chona thar hmachhawn tura club a chhuahsan thu a sawi a, City-ah khelhna hmun chang turin theihtawp a chhuah a ṭul ang.

City hian kum 2016 khan Laporte lakluh nan euro maktaduai 60 sen an inhuam tawh a, amaherawhchu French defender hian a la inpeih loh avangin Bilbao-a cham a thlang. Thla 18 hnuah City an lang leh a, chona thar hmachhawn turin a inpeih tawh.

World Cup ṭan nan thla ruk pawh a tling tawh lo a, France tan a la khel lo. Didier Deschamps chuan Laporte chungah rinna a nghat ngam lo a, tharum a ngah tawk lohna chu a rin loh chhan bera ngaih a ni. England-ah Laporte hian striker tharum ngah zawk a hmachhawn ang a, an ram manager Deschamps hmin theihna hun ṭha a ni thei ang.

Laporte hian kum 2010 aṭanga a chen tawhna Spain tan a khel thei tawh a, amah pawhin 2010 World Cup champion tana khelh hi a hreh lo. French defender tana pawimawh hmasa erawh City tana khelh phak a ni a, Pep Guardiola-a'n a lakluh chhan hi John Stones leh Nicolas Otamendi te thachhang dawl tura ngaih a nih avangin starting eleven chan a awlsam dawn lo.

City hian nikum season tawp aṭang khan defender lakluh nan pound maktaduai 190 vel zet an seng ta a, attacking football khel ṭhin Pep pawhin nomawi chawi turin tlarhnung pawimawh zia a hrechiang hle.