Aubameyang vangin Giroud a buai

Arsenal chuan an club player manto ber ni turin Borussia Dortmund forward Pierre-Emerick Aubameyang chu pound maktaduai 60-in lakluh an tum a, pawisa leh mimal inremna an siamfel tawh.

Gabon international hian Emirates Stadium-ah chawlhkar khat chhungin £180,000 a hlawh dawn tih thlengin a chiang tawh. Mahse, Arsenal-in an player duh an lakluh theih nan chuan an kawl sa Olivier Giroud dinhmun tur an tih chian tel a ngai.

Nipui lai khan Arsenal hian Lyon aṭangin Alexandre Lacazette chu pound maktaduai 52-in an lalut a, club player manto ber a ni. Aubameyang hi an lalut a nih chuan thla nga hnu lekah player pakhat lei nana an sum hman hnem record hi an khum dawn tihna a ni.

Kum 28 mi Aubameyang leh Giroud bakah Premier League champion Chelsea striker Michy Batshuayi te hi club thar nei thut thei langsar an ni a, tun thlasik transfer hi India aṭanga chhut chuan Ningani zing dar 4:30-ah a tawp dawn–Premier League club zingah Arsenal hi boruak nei lian ber an ni mek.

Ni thei chu
Arsenal leh Aubameyang an inrem tawh a, mah se Dortmund lamin an striker thlakna an hmu phawt a nih loh chuan chhuahtir an phal bik lo. Aubameyang leh Giroud te hian an khelhna club inthleng nise chuan thil a fel mai tura ngaih a ni.

Mahse, kum 31 mi Giroud hian London-a chen a duh a, hei hi nikum nipui laia a chhuah loh chhan langsar tak pakhat niin a lang bawk. Chelsea hi striker zawng lai an ni a, English football-a tawnhriat ngah Giroud hi lakluh an hreh lo.

Ti zawk hian?
Dortmund hian Chelsea tana hmun chang mumal lo striker Michy Batshuayi chu a nghetin lak an duh. Belgium international hi Blues lam hian hralh tawp ai chuan loan hmanga chhahtir an duh thung.

Awlsam taka a lan dan chuan Aubameyang-a'n Arsenal pan se, Giroud pawh London club Chelsea tan khel zui tawh zawk se, World Cup khelh duh Batshuayi pawhin Dortmund jersey ha chungin khelmual chhungah hun a hmang tam deuh tawh ang.

Amaherawhchu, Arsene Wenger-a enkawl Arsenal hian an striker Giroud manah hian pound maktaduai 30-35 vel an beisei a, Blues tan striker uaithla lam tawh lei nan hetiang zat sen hi thil awlsam a ni bik lo.

A awlsam lo
Antonio Conte-a'n striker thar lakluh a duh tih chu thil chiang a ni a, Stamford Bridge-ah Spanish forward Fernando Llorente lakluh tumin Tottenham nen inbiakna an nei nia sawi a ni.

Spurs hian Llorente leh Batshuayi hi an inthleng dawn a nih chuan a ngheta neih an duh. Mahse, Tottenham hian khawihchet thiang lo Harry Kane an neih avangin Batshuayi hian bench ṭhutna sawn ringawt chu a duh bik lo.

Real Madrid aṭanga Alvaro Morata laluttu Chelsea hian tlarhma a chhawr tur an la duh belh hle, Italian Serie A lama cheṭha tak Edin Dzeko nen pawh sawi zawm an ni.

Kawng a awm
Arsenal hian Aubameyang an neih ran theih nan chuan an hmelma leh elpui Chelsea lakah Giroud kaltir hreh lo se, Blues pawhin Batshuayi an chhuah zalen hma maiin a rinawm.

Dortmund hian thlakna nei hmasa loa Aubameyang an chhuahtir duh bik loh avangin, Giroud chungchangah London club pahnih an inrem theih chuan Aubameyang thlak nan Batshuayi an lalut thei thung dawn a ni.