Daniel Sturridge-a'n West Brom a pan

Liverpool striker Daniel Sturridge chuan Anfield chhuah-sanin West Brom a pan a, Baggies tan hian season tawp thleng loan-in a khel ang. Kum 28 mi striker hi Newcastle United leh Inter Milan pawhin lakluh duhin an hel a, mah se Baggies lam pan a thlang ta zawk.

England tan vawi 26 inlana goal riat khung thei striker hian Premier League-ah match 114 inkhel bul a ṭan aṭangin goal 74 ngawt a khung thei a, cup competition lamah pawh goal 27 khungin striker ṭha a nih thuah inhnialna tur a awm lo.

Mahse, kum 2013-a Chelsea aṭanga Liverpool pantu striker hi tun hnaiah hliamin a tlakbuak fo avangin a talbuai a, tun season-ah Liverpool tan match nga chiah inkhel bul a la ṭan a, match 14-a khelahah goal thum a khung sak.

West Brom boss Alan Pardew chuan, "He club tan chuan chanchin lawmawm tak a ni a, talent nei ṭha bik player a ni," tiin a striker thar hi a fak. Baggies hian Egypt defender Ali Gabr chu Zamalek aṭangin season tawp thleng atan loan-in a hawh bawk.

Manchester City-a a career ṭantu striker hian Chelsea-a a awm lai khan Bolton Wanderers-ah loan-a khelin a hun laia Premier League club tan hian league match 12-ah goal riat a khung sak thei a, a career-a a hun duhawm ber chu 2013-14 season khan Liverpool-ah hmangin match 33-ah goal 24 a khung.