Brandon-a'n East Bengal a chhan thei lo
Mizo tlangval Brandon VL Remdika'n East Bengal tan goal khung mah se Minerva Punjab lakah a team hi hnehna a chanpui zo lo a, 2-2 in an inhnehtawk.
Minerva tan champion kalkawng a hnai sawt a, Khalid Jamil-a leh a naute tan champion tur chuan chet ṭhat bakah Punjab club chetsual chan tel a ngai tawh.
Nimin tlai inkhelah Mikhual team Minerva hian hma takah goal hnih an khung a, Eb-in chhanletna hun ṭha an neih hmasak berah Katsumi Yusa chuan penalty a pet goal lo - season tawpah nomawi an chawi lo a nih chuan he penalty hi East Bengal fan-ten an hre chhuak vawng vawng ang.
Minerva an thiam
East Bengal-in Minerva aiin chak an mamawh zawk a, khelmuala inkhel bul an ṭan dan aṭanga thlir erawh chuan Kolkata club aiin Minerva-in chak an duh zawk. Bhutanese forward Chencho Gyeltshen-a'n hun ṭha nei nghal mah se a chhawr lo.
Minute 20-a nihin Minerva-in goal hmahruai an khung - Sukhdev Singh-a goal shot chu East Bengal tana a match hmasa ber kheltu goalkeeper Ubaid CK chuan a dang per a, ball changtu Salam Ranjan Singh-a'n a petchhuah theih loh hnuah ball per hi Sukhdev chuan goal hmahruai ni turin a khung.
Minerva an lansarh chhunzawm a, minute 13-naah an goal hnihna an khung - penalty area pawn chiahah Punjab club-in freekick beisei mah se pek an nih loh hnuah hemi aṭanga ball kalzel chu Chencho-a'n goal-ah a chantir - he goal khung tura Bhutan international chet ranna leh finishing tawih chu fak tlak a ni.
Mizo inlar hun
East Bengal coach Khalid Jamil-a'n attacking game khelh a ngai tih a hria a, Bagan duh loh hnu Ansumana Kromah chu minute 42-naah luhtir niin Kolkata club-in striker pathum an nei - chawlhlawk hma hretin Minerva defender Guy Eric Dano chuan chiang takin Kastumi ti tlu mah se referee-in penalty a pe lo.
Chawlhlawk hman hnuah Mizo tlangval an inlar ṭan a, Laldanmawia Ralte chuan penalty a hlawh chhuak - East Bengal hlim chhung erawh a rei lo hle. Penalty pettu Katsumi-a'n goal-ah a chantir thei lo a, Sialhawk Express thawhrimna a thamral.
Danmawia'n corner a hlawh chhuak chhunzawm a, corner aṭanga ball kal hi Jobby Justin chuan a tauh lut - Khalid-a'n thutlukna dik a siam chhunzawm a, Brandon chu minute 78-naah luhtir a ni. Mizo tlangvalin minute 11 chiah hun a hmang hman tihin Katsumi goal shot per lo let leh chu an si phurh sut zawh nan a khung - Danmawia'n post a pet per zui a, goal dang erawh an khung tawh lo.
Beisei a bo lo
East Bengal tan champion beiseina bo tawh angin lang mah se coach Khalid Jamil erawh a la beidawng lo. Aizawl FC coach hlui chuan, "Fan-te hnena ka sawi duh chu hei hi a ni. Beidawng tur kan ni lo a, kan hmaah zau takin kawng a la inhawng a ni," a ti.
Jamil chuan, "Ka player-te khan an vaiin theihtawp tak meuh meuh an chhuah vek a, he team tana nomawi chawi hi an duh," tiin a naute nen theihtawp an chhuah chhunzawm tur thu a sawi.
Minerva coach Khogen Singh chuan, "Champion turin match li chak bak kan mamawh tawh lo a, East Bengal mamawh zat chu match ruk a ni. Chumi awmzia chu kan tan champion kalkawng hi a la inhawng zau zawk tihna a ni," a ti a, champion a inbeisei.