Rinkai Saina leh Sindhu

India Open Super Series chu nimin aṭang khan qualifier khelh ṭan a ni a, tunkar chhung khelh tur a ni dawn. Inelnaah hian khawtual player PV Sindhu leh Saina Nehwal te chu champion tura rinkai zingah an tel phak.

World number 1 hlui Saina-i'n kum 2015 khan Indonesia Masters final a luh hnuah India ramah hlawhtlinna a chang zui thei a, kuminah beiseina a nei sang leh hle. London Olympic bronze medalist hian a match hmasa ber atan Sofie Dahl a hmachhawn dawn a, a tlang zel a nih chuan seeded pangana Beiwen Zhang nen quarterfinal-ah an intawng ang.

Rio Olympic silver medalist Sindhu hi champion lai a ni a, season hmasa khan nomawi pathum bakah silver medal pathum bawk dawngin kum duhawm a hmang - Sindhu tan mahni rama bul ṭan fuh a pawimawh dawn, match hmasa berah chuan Natalia Rohde nen an inkhel dawn; a kalkawngah hian world champion hlui Ratchanok Intanon a awm thei dawn bawk.

Mipa singles lamah chuan 2014 champion Kidambi Srikanth chu India beisei neih sanna a ni ang. Season hmasa chhunga super series title pali la thei Srikanth hi kar hmasa a khelh zawh tak Indonesia Masters-ah a inlan lo a, inbuatsaihna hun thawl a nei. World number 3 Srikanth hian tournament bulṭan nan Lee Cheuk Yiu a tum ang.