Zaninah Madrid khaw club veltu

Copa del Rey semifinal first leg chu zaninah khelh a ni dawn a, quarterfinal aṭanga Madrid khaw club hnawt chhuaktu pahnih Leganes leh Sevilla an intawng dawn–club pahnih hian an ngam loh tura ngaih quarterfinal-ah an hneh ve ve avangin an inringtawk khawp ang.

Sevilla hi quarterfinal inkhel pahnih belhkhawma Atletico Madrid 5-2 a hneh thei an ni a, Leganes hi an muala 1-0 a an tlawm zet hnua Santiago Bernabeu-a 2-1 a Real Madrid hneh thei ngat an ni–club pahnih tan league leh nomawi dang beisei chi a ni lo a, Spanish Cup final luh ngei tumin an theihna zawng zawng nen an bei ang. Inkhel a hmuhnawm dawn tihna a ni.

Quarterfinal-a hnehna an chan hnu lawkah Sevilla hian 1-1 in Getafe an inhnehtawkpui zui a, Leganes erawh Espanyol laka 3-2 a chak hlim an ni–an phur vanglai tak a nih dawn avangin Sevilla tan a harsa ang.

Sevilla hian hliam vangin an defender pathum Simon Kjaer, Daniel Carrico leh Nicolas Pareja te an chhawr thei dawn lo a, Leganes hian hliam vangin defender Mauro dos Santos leh midfielder Alexander Szymanowski an chhawr thei bik dawn lo.