Grand Slam champion nih chak Tsitsipas

Tennis player chhuak thar zinga beisei awm tak Stefanos Tsitsipas chuan kumin chhung ngeia Grand Slam champion nih a chak thu a sawi a, Greek tlangval hian nomawi lian tham chawi chak avanga mawhphurhna rit tak insiam chawp erawh a duh lo thung.

Roger Federer, Rafael Nadal leh Novak Djokovic ten tun hnai kum 10 chhung chu major title an inlak sem vek deuhthaw. 2016 US Open-ah Stan Wawrinka a champion ve zauh a, a hnu lamah phei chuan player lian pathum hian nomawi lian tham an hui vek.

Kum 21 mi Tsitsipas chuan, "Ka naupan lai aṭangin Grand Slam champion nih ka châk a, tun thlengin ka thil tum leh châk hi a la danglam lo. Thil tum ti hlawhtling tur hian hmanhmawh erawh a tih chi hran lo, zawi muanga hmasawn zel chunga hlen chhuah tur a ni ang.

"Tournament lian ka khelh tawh ho ka thlir kir a, hlawhtlinna chan theihna kawng chu a inhawng chuan ka hria. 

Chutihrualin kar hnih chhung inelna neih a nih tawh chuan a tawp lamah chet buai theih a nihzia pawh ka hre tawh, hlawhtlinna lian chang tur chuan tawnhriat ngah a lo pawimawh hle," a ti.

Season hmasa khan a thiam zual pariat inelna ATP Finals-ah Tsitsipas hian nomawi a chawi a, theihna a neih san bakah a rilru a huaisen tih a hriat. Chutihrualin a ṭha pariat inelna ni mah se Grand Slam angin set nga an khel lo, kar khat chhungin set thum hmanga inelna neih a ni.

World number 6 Tsitsipas chuan, "Tennis player hlawhtling ni tur chuan dawhtheih a ngai tih pawh ka zir chhuak ve tawh bawk. Djokovic nun aṭangin zir tur a tam, ani pawh hian Nadal leh Federer inkara chawr chhuak tur khan a hun ṭha thlen hun chu dawhthei takin a nghak," a ti.