Man United-in Sancho tlangzarh chiah an hmabak ta

Jadon Sancho-a'n Thawhlehni khan Manchester United a khel turin Carrington training complex-ah medical test a nei a, English club hian an player thar hi tunkar chhoah an tlangzarh ang.

Man United leh Borussia Dortmund te hi Sancho chungchangah pound maktaduai 73 in an inrem a, tun thla tir khan an inrem tawh a, Euro 2020 zawhah ziakin an tifel.

Man United hian Euro 2020 leh Copa America-a tel player zawng zawng kar thum chawlh an pek vek avangin Ole Gunnar Solskjaer-a'n Sancho hi a la chhawr thei lawk dawn lo.

Chutihrualin English winger hian a chawlh a titawi a nih chuan July 28 zana Brentford nen a inkhelh hunah a inlan thei ang. Tuna a lan dan chuan Sancho inkhelh hun tak tura beisei chu August 7-a Everton nen friendly match an khelh hunah a nih a rinawm.

Manchester United leh Dortmund-in inremna an neih hma avangin Solskjaer-a tan season thara an khelh dan tur duan a awlsam sawt dawn. Inhliam vanga Marcus Rashford a awm dawn loh bawk avangin August 14-a Leeds United nen Premier League match hmasa ber an khelh hunah Jadon Sancho hian bul a ṭan theih a beiseiawm hle.

English club hi Sancho ringawtah an lungawi lo a, Real Madrid defender Raphael Varane leh Rennes midfielder Eduardo Camavinga te nen an sawizawm. Kum 28 mi Varane hian chona thar hmachhawn a duh a, Real Madrid pawhin a contract zawh huna a thlawna chhuahtir ai chuan pound maktaduai 40-55 bawr vela chhuahtir an phal mai rin a ni.

Man United-in Sir Alex Ferguson-a hunlai aṭangin Varane hi an en thla tawh a, an lakluh theih chuan Manchester City el pha thei turah a ngaih theih ang. Chutihrualin PSG lam pawhin Sergio Ramos an la tawh chungin Varane lakluh hi an hreh lo nia sawi a awm bawk.

Kum 18 mi Camavinga-a'n kum khat chiah contract a nei tawh avangin Rennes tan rilru fim taka ngaihtuah a ṭul a, Man United lam pawh an hmanhmawh lo. English club hian player langsar lalut tur chuan an in ṭhuah fai a ṭul dawn a, chhuak thei tur zingah Brandon Williams, Jesse Lingard, Paul Pogba, Axel Tuanzebe leh Phil Jones te hming a ri tel.

Solskjaer-a'n season liam taa AC Milan an hawhtir Diogo Dalot enchhin a duh niin sawi a awm a, chutihrualin England right back Kieran Trippier chu pound maktaduai 10-in an lo dawr tawh bawk. Amaherawhchu Atletico Madrid-in Trippier-a manah pound maktaduai 28 an beisei a, English defender hi September thlaah kum 31 a tling ang.