Olympic khel lo tur Federer

Grand Slam vawi 20 champion tawh Roger Federer chuan Tokyo Olympic a khel dawn lo tih a puang a, hmeichhe inelna huang lamah Johanna Konta pawh a inhnukdawk ve bawk.

Kum 39 mi Federer hi French Open-ah khel ṭha viau mah se a khup dinhmun a ṭhat tawk loh vangin a inhnukdawk. Wimbledon a khel a, a tir lamah khel ṭha viau mah se a tum ram erawh a tleng zo lo.

Switzerland star Federer chuan, "Grass court season hman lai khan vanduai thlak takin ka khupah harsatna ka nei leh, hreh tak chung siin Tokyo Olympic aṭanga ka inhnuhdawh a ngai. Switzerland tana inlan phak nih hi chawimawina a ni a, inlan theih loh hi a hrehawm dawn.

"Tunah hian enkawl lai ka ni a, season tawp lamah chuan inkhel tura ka lo kir leh theih ka beisei. Japan rama feh chhuak tur Swiss team chu hlawhtlinna chang turin duhsakna sang ber ka hlan, kumtluangin Swiss," tiin a sawi.

Swiss legend hian Beijing Olympic-ah khan Stan Wawrinka nena ṭang dunin doubles huangah gold medal an la. London Olympic-ah khan singles bikah final a lut, mahse tualchhung tlangval Andy Murray a hneh loh avangin silver medal a dawng.

Olympic hi kum li dana neih a ni a, tun dinhmunah Federer hi kum 39 mi a nih tawh avangin a tan Olympic khelh beiseina a thamral zui nghala ngaih a ni - Olympic an neih leh meuh chuan kum 40 chuang a ni tawh dawn.

Great Britain nula Konta pawhin a inlan theih loh tur thu a sawi. Konta chuan, "Tokyo-ah ka kal thei dawn lo, tun dinhmunah inelna hmachhawn turin ka la inpeih lo a ni. Rio Olympic chauh kha ram tana infiamna khawmpui liana ka inlan chu a nih hmel ta," a ti.

Season kal laiah Konta hi hliam leh hri leng vangin a buai, inelna hrang hrangah match 15 chiah a la khel. A hliam a la dam loh vang hian grass court inelna lian Wimbledon aṭang pawhin a lo inhnukdawk tawh.