McGregor-a hun a tawp tawh - Khabib

MMA fighter awm tawh zinga ropui ber ang hiala mi tam takin an ngaih Khabib Nurmagomedov chuan a hmelma hlui Conor McGregor career chu a zo tawh angah a ngai a, "A sang zingah a awm tawh lo ang," a ti!

Khabib chuan, "A ke ruh a tliak a, a hma angin a pet leh thei tawh dawn lo. Ka ngaih dan chuan top level-ah chuan a kir leh tawh lo ang. Conor hi kum 33 mi a ni a, a ngaihtuahna leh a ke hliamte ka ngaihtuah hian a career chu a zo tawh. Mahse, promotion atan chuan a ṭha ve khawp alawm," a ti duh chauh!

McGregor hian Pathianni zing khan a zawna a vawi hnih nan Dustin Poirier chu UFC 264-ah a ngam lo a, round khatnaah a ke ruh a tliah avangin doctor-in fight chhunzawm a phal lo - technical knockout hmangin Poirier chu chak zawkah puan a ni.

Hetihlai hian McGregor ṭantu tam tak chuan Irish fighter hi inhliam lo ta se fight result a danglam theih tur thu an sawi a, McGregor hian, "Tun hi a tawpna a ni lo," a ti bawk - Khabib-a ngaihdan erawh a dang thung.

MMA-a vawi 29 fight-a hmachhawna tlawm nei lo fighter chuan, "Fight a tawp khan judge-te khan 10-8 in Poirier kha an chaktir sa tawh. Round khatnaah khan a duhthalin a sawisa tawh a ni - vawi 100 pawh inhmachhawn nawn se, result a danglam lo ang," a ti!

September 27, 2014 khan McGregor leh Poirier hi a vawi khat nan an inhmachhawn a, technical knockout hmangin Irish fighter hi a chak.

January 24, 2021 khan a vawi hnih nan an intawng a, thawnthu a danglam tawh - Poirier-a'n round hnihna lekah Irish fighter hi a knockout a, Pathianni khan round khatna lekah a hneh zui leh ngat.

Khabib chuan sum leh hmingthannain mihring nihna diktak a pholan ṭhin thu sawi zuiin McGregor chu sum vanga talbuai ta zuiah a puh.

Russian fighter chawl tawh chuan, "Sum leh hmingthannain mihring a thlak danglam ṭhin thu kan sawi fo a, a nihna takah chuan heng thil pahnih hian mihring nihna tak a pho chhuak ṭhin a ni zawk," a ti.

Khabib chuan McGregor chu naupangten ngaisang lo se a duh thu sawi zuiin, "Eng thil ṭha nge a tih tawh? Kum 2019 khan a aia upa zawk lakah mawi lo takin a che a, Dustin-a'n, "Ṭhatna nei lo," tia a sawi kha a dik a ni.

"Social media lamah McGregor thlawpna tam tak ka hmu a, engtinnge naupang leh ṭhangtharten an hmuh ve reng laiin ani ang mihring hi in chawimawi theih? Fight tih lar in duh chuan ti lar mai rawh u.

"Mahse, MMA chhungkua hian ani ang mihring fel lo tak hi an chawi lar zel a nih chuan MMA hi a ṭha lo zawngin miin an hmu mai ang," a ti a, chanchin ngah McGregor a ngaisang lo hle.

October 6, 2018 khan Khabib hian round linaah submission (neck crank) hmangin round linaah McGregor hi a lo hneh tawh a, a hnuah Poirier leh Justin Gaethje chu a zawna hnehin a chawl zui - UFC president Dana White chuan Khabib hi hruai kir theih inbeisei mah se a thutlukna siam tawh a sawhsawn sak thei lo niin a lang.