Messi lakah PSG an beidawng

Barcelona-a contract thar a la ziah loh avanga free agent ni mek Lionel Messi chu Paris Saint-Germain-in lakluh tumin bei ngawrh viau mah se an tlawmsan.

French chanchinbu lar Le Parisien-in a tarlan dan chuan PSG hi Argentine forward lakah an beidawng tawh - Barca fans tan chuan thu hriat nuam tak a ni ang.

Barcelona-a Messi nena khel dun ṭhin Neymar chuan nikum khan Argentine forward nena khelh dun leh a châk thu a sawi a, a tu emaw zawk chuan an club khelhna an chhuahsan a rinawm hman.

Mahse, Neymar hian PSG-ah contract thar a ziah avangin Messi zawk hian Paris khawpui a pan dawn niin an sawi - tuna a lan danah erawh Messi hi Nou Camp-ah a cham dawn.

Barcelona president Joan Laporta chuan fan-te chu mangang lo turin vawi tam a lo chah tawh a, Messi chuan contract thar a ziah vat tur thu a sawi.

Kar hnih dawn free agent anga hun hmang tawh Messi hian a career-ah Barcelona tih loh club dang tan a la khel lo a, Catalan club tan hian inelna hrang hrangah match 778 khelin goal 672 a khung - nomawi chawi theih ang chu a chawi kim.