Hmabak kan la ngah - Arteta

Arsenal chu Premier League season thar inbuatsaih turin Scotland an pan a, coach Mikel Arteta naute hian Thawhlehni zan khan Scottish club Hibernian chu friendly match khelh puiin 2-1 in an tlawm.

Gunners manager Arteta chuan, "Keini aiin Hibernian khan inbuatsaihna an nei ṭha zawk tih a chiang. Keini lam chu a bul ṭan thar leh chauh kan la ni a, season ṭan hmain siamṭhat ngai leh hmasawnna tur kan ngah," a ti.

Easter Roaf-a inkhelah Arsenal hi an captain Pierre-Emerick Aubameyang hoin an thawk chhuak a, goal hmaah erawh an hlauhawm loh hle. Eddie Nketiah-a'n keeper chauh a hmachhawn tawhah goal zawnah a pet thei lo.

Defender Cedric Soares-a back pass chu harsa vak loa pet chhuah theih niin lang mah se, keeper Arthur Okonkwo-a'n a pet ṭhelh a, midfielder Martin Boyle-a'n chang fuhin minute 21-naah goal hmahruai a khung.

Hibernian lamin second half-ah Daniel MacKay hmangin an goal hnihna an khung belh. North London club tan Nicolas Pepe leh Thomas Partey ten freekick aṭangin goal bar an pet per a, forward Pepe hian penalty a hlah bawk.

Hun tawp dawnah Arsenal mualpho lutuk tur hliah khuh nan Emile Smith Rowe-a'n goal khat a khung. Gunners hian Inrinni zanah Steven Gerrard-a kaihhruai Rangers chu friendly match an khelhpui leh ang.

Arteta chuan, "Rangers hi player ka nih laia ka lo khelh tawhna a ni, anni nen kan inhmachhawn tur hi a phurawm a, a hlu dawn hle bawk," a ti. An hmachhawn leh tur hi Scottish Premiership champion an nih avangin a awlsam dawn lo.

Player Inlan
Arsenal: Okonkwo (Hein 46'), Cedric (Bellerin 62'), Clarke (Rekik 46'), Mari, Kolasinac (Hutchinson 80'), Nelson (Partey 46'), Elneny (Henry-Francis 75'), Maitland-Niles (Pepe 46'), Willian (Smith Rowe 46'), Nketiah (Balogun 46'), Aubameyang (Lacazette 46').