Tennis inelna ropui chhawp chhuaktu Federer, Nadal leh Djokovic

Lionel Messi leh Cristiano Ronaldo ten football lamah en nawm ropui an chhawp chhuak ṭhin a, basketball huangah chuan LeBron James leh Stephen Curry te an awm - Lewis Hamilton leh Marc Marquez ten F1 leh MotoGP an awp dan chanchin pawh a ngaihnawm.

Tennis huangah pawh tun hma lama la awm ngai lo, inelna ropui leh tennis hmuhnawm bik chhawp chhuaktu an awm - Roger Federer, Rafael Nadal leh Novak Djokovic ten inelna an hmachhawn lai hmu hmana i awm hi i vannei a sin aw.

Wimbledon 2021 final an khelh zawh hnuah, tennis legend John McEnroe chuan, "Novak Djokovic hian Grand Slam title 25 a la tling lo a nih chuan a mak zawk hial ang," tiin a sawi a, a thu sawi hian Serbian star ropuizia a tarlan rualin Federer leh Nadal te nen an inkar a hril tel bawk.

Title 20 chu...
Pete Sampras-a'n Grand Slam nomawi 14 a chawi tlin khan khawvelin mak a ti a, a hlawhtlina hi ropui a tiin player dangte tana khum leh harsa tak tawh turah an ngai - midangin an tih theih loh a tih miau avangin a ropui takzet.

Mahse, Federer leh Nadal hun a rawn her chhuak, player ropui pahnih hian hun rei tak chhung chu tennis khawvel an thunun a, nomawi lian leh hlu bik chu an insem zo zel a ni deuh ber, player dang tan hmun an kian meuh lo.

Swiss star Federer-a'n Sampras a rawn khum a, a khum hnuah pawh chawl loin a kal zel. A elpui Nadal pawhin a duh tawk mai lo - Spanish tlangval hian French Open ringawt pawh vawi 13 a chawi - Sampras a major title lak zawng zawng khan Roland-Garros aṭangin a tluk ṭep!

Federer leh Nadal-a'n Grand Slam title 20 teh meuh an la tling thei a, player ṭha leh ropui bik an nih miau avangin a mak hran lo - tun hma lama player dangte ai khan an upat hnuah an khel ṭha rei thei bawk a, an sulhnu hi a chhuanawm.

Nole a lo lang
Nadal leh Federer te vanglai a tawn avangin Djokovic tan a hun hmasa lamah nomawi lian chawi pup pup a harsa. Serbian star hian tun hma deuh khan, "Anni anga tharum neih hnem ve hi ka chak," tiin a elpuite aia tharum a ngah loh thu a lo sawi tawh.

Pa luhlul leh beidawng ve ngai lo a ni a, a tum hlen chhuak turin zawi muangin hmalam a pan zel. A inkhelh thiamna Australian Open-ah a khat tawkin a hlawhtling ve reng a, inelna dangah erawh a elpui pahnih a tluk thei meuh lo.

Grand Slam nomawi 10 chuang a lak hnuah Djokovic hi a chuai mai dawn niin a lang hman. 2017 vel bawr khan a dinhmun a tlahniam viau a, a kum a tam chhoh ve tho tawh avangin a zui chhunzawm mai pawh a rinawm hman.

Wimbledon 2018 an khelh lai phei chuan Djokovic hi world ranking-ah pawh 22-na daih a ni a, mahse grass court inela lianah hian a hun laia world number 1 Nadal hnehin final a lut a, final-ah Kevin Anderson hnehin a champion zui - a hnu lamah a hawi kir tawh lo.

A umphak
Zawi muangin Djokovic-a'n major title lak hnem lamah Federer leh Nadal te a um zel. Hripui leng vangin 2020 season bikah Wimbledon an khel thei lo a, hemi season-ah hian Australian Open bak erawh a lak belh thei bik lo thung.

Season thar a lo her chhuak a, a tih ṭhin dan pangngaiin Melbourne Park-a inelna lianah Nole-a hi a champion; Nadal-a lal ram Paris khawpuiah a pen lut zui a, ram awptu hi hnehin final a lut a, a champion zui bawk - Grand Slam a neih zat chu 19 a ni ta!

Hri lengin ziaawm lam a pan zel - Wimbledon pawh an khel thei. Vawi riat champion tawh Federer a lo kir a, khel ṭha viau mah se quarterfinal-ah a tla; Nadal a inlan lo bawk. Player lian dang an chet fuh hleih theih loh laiin Djokovic a champion.

Kum 34 a pumhlum meuh chuan Grand Slam title 20 a la tling ta, a elpui Nadal (kum 35) leh kum 39 mi Federer te aiin a taksa a la 'fit' ṭha zawk niin a lang a, player ropui pathumte hi tun hnaia an intawn kualnaah Djokovic hi a chungnung fal bawk - a hmabak a eng takzet.

An beisei sang
Mipa inelna huangah bik chuan Federer, Nadal leh Djokovic te aia Grand Slam nomawi chawi hnem an awm lo - an la chawi belh leh ngei pawh a rinawm, tun season atan US Open an la hmabak bawk.

Tennis pumpui thlir erawh chuan, hmeichhe player - Margaret Court (24 titles), Serena Williams (23) leh Steffi Graf (22) ten record an nei ṭha fal a, an zingah hian Serena chiah hi la inkhel lai a ni, a dang pahnih hi chuan an lak belh dawn tawh lo.

American legend John McEnroe chuan, "Djokovic hian tun hma zawng ai khan tunah hian a khel ṭha zawk, a lan dan chuan Grand Slam title ringawt pawh pali emaw panga emaw la lak belh ka la ring. A hriselna dinhmun a zir erawh a ni ve thung ang.

"A elpui dang zawng zawngte aiia ṭha falin a awm mek, sulhnu ropui leh ṭha siam tur erawh chuan a rilru put hmang a dik a ngai dawn bawk. A khelh dan leh theihna chhut chuan hei aia thui tak hi a la kal thei ang," tiin a sawi.