Virgil van Dijk a ṭha - Jurgen Klopp

Liverpool fan-ten Premier League ṭan hmain an thu hriat duh an hria a, an defender ṭangkai Virgil van Dijk leh Joe Gomez te dinhmun a ṭhat thu coach Jurgen Klopp chuan a sawi.

Reds hian pre-season training camp chu Austria-ah an nei mek a, Klopp chuan defender pahnih bakah hian Euro 2020 ṭan dawna inhliam Trent Alexander-Arnold leh Joel Matip te pawhin ngai an awh chho thu a sawi bawk.

Liverpool hi season hman zawh takah khan Manchester City nen inel leh ber tura ngaih an ni a, mahse, an tlarhnung lam buaina avangin beisei an phak lo - season a tawp meuh chuan Champions League an khel phak hram a ni.

Reds hian July 23, zan dar 9:45-ah Mainz nen friendly match an khel dawn a, July 29, zan dar 11:50-ah Hertha BSC nen an inkhel leh bawk ang - Premier League-a an match hmasa ber chu Norwich City nen August 14, zan dar 10:00-ah khualmualah an khel ang.

An ṭha e
October, 2020 khan Merseyside derby-ah VVD a inhliam a, Dutch defender hian a hliam vangin season tluanin a hmel a lan tawh lo - Euro 2020-ah a kal thei lo bawk.

VVD inhliam hnu lawkah ram tana a fehchhuahna lamah Joe Gomez a inhliam ve leh a, season tluanin a reh zui. Tlarhnung laia defender pawimawh pahnih inlan thei lo hi Reds tan channa a ni a, tunah erawh ngai an awh leh ṭan ta.

Klopp chuan, "Virg leh Joe te hian player dang angin ni khata vawi hnih training chu an la zo kher lo ang. Ni khatah vawi hnih chu session an nei ve ngei a, a hnuhnung zawk erawh rehab leh physiotherapy department lamte nen an hmang ṭhin.

"Hei hi Virg leh Joe chungchanga ka sawi theih chu a ni a, tunah chuan an ṭha takzet a, harsatna a awm rih lo. Engtikah nge tuna kan kalpui dan hi kan thlak theih ang ka hre lo a, tun aṭanga kar liah tal chuan a nih theih kan beisei thung," a ti.

Hello Arnold
Euro 2020 England squad-ah Alexander-Arnold tel mah se Austria nena friendly match an khelh ṭumin a malpuiah hliam a tuar a, squad aṭangin a inhnukdawk zui - mahse, Arnold pawhin ṭhat lam a pan tawh.

Klopp chuan, "Trent-a inhliam kha a tirah chuan a ṭha lo em em a, mahse, tunah chuan a zia tawh e. Ngai a awh ṭan mek a, mahse, tun aṭanga ni nga emaw ni rukah hian special programme a nei leh phawt ang. Zawi zawiin a inenkawl ang a, rei lo teah team training pangngai a zawm thei ang," a ti.

Hliam vanga talbuai ngun ve tak Joel Matip-a'n February-a hliam a neih hnuah Reds tan a hmel a lan leh tawh lo a, mahse, kum 29 mi centre back hi khelmualah a inlan thei leh ṭep tawh.

Liverpool coach Klopp chuan, "Joel dinhmun a ṭha a, kan defender pali zingah chuan ani hi a lo kir hnai bera kan ngaih a ni," tiin Cameroonian centre back dinhmun a sawi.