Jorginho-a'n Ballon d'Or a beisei

Ballon d'Or dawng tura hming ri ring tak Jorginho chuan khawvela footballer ṭha ber chawimawina dawng thei dinhmunah a din thu a sawi a, a indah bo duh lo!

Chelsea midfielder hian Blues tan Champions League nomawi chawiin player pawimawh a ni a, European Cham-pionship-a Italy an champion theih nana tha thawh hlawk player a ni leh bawk.

Jorginho chuan, "Duhthusam chu kan nei vek a, mahse, dik taka sawi chuan Ballon d'Or dawng tur chu a thlangtute thlirna leh duh danah a innghat ang chu.

"Talent chungchang kan sawi a nih chuan khawvela player ṭha ber ka ni lo tih ka hrechiang a, mahse, nomawi aṭanga kan teh dawn a nih chuan tun season-ah chuan kei aia champion hnem an awm lo," a ti.

Italy international chuan sawi zawmin, "Engtin nge Lionel Messi, Neymar emaw Cristiano Ronaldo emaw nen ka inkhaikhin theih ang? Anni nen chuan player inang lo tak kan ni a, mahse, ka sawi tawh ang khan a thlangtute thlirna leh duh dan a pawimawh ber," a ti a, nomawi chawi tam lam an en chuan Ballon d'Or dawn a beisei.

Kum 29 mi Jorginho hi Brazil-a piang leh seilian a ni a, kum 15 a nihin Italy-ah a pem chauh - ram pahnihah a duh zawk zawk tan a inlan thei a, a tawpah Italy a thlang.

Napoli midfielder hlui chuan, "Ka inngaihtuah buai lo. Italy Under 21 tana ka inlan hnuah friendly match-ah bak senior team tan ka inlan zui lawk lo a, November 2017 khan Sweden nena World Cup playoff khel turin koh ka ni ve ta a ni.

"Khatihlai khan Brazil pawhin ram tana inlan turin min duh a, ka naupan laia ka duhthusam ni ṭhin pawh Brazil tana inlan phak a ni. Mahse, Italy-in koh khan ka puih an mamawh tih ka hria a, he ram hi mamawh ka nih laia ka tana kawngkhar hawngtu an ni tlat.

"Ka thinlung chuan, 'Italy-in a mamawh che,' tiin min hrilh a, thutlukna ka siam ta a ni - ka siam sual lo hle pawhin ka hria," a ti a, Italy a thlang chu tifuh a inti hle.

Hetihrual hian Jor-ginho hian Ballon d'Or beiseina a neih rualin Messi a awm ve tih hriat a ṭha a, kum 34 mi forward hian Copa America-ah Argentina a champion pui avangin khawvela footballer ṭha ber chawimawina dawng tur hian a hming a ri ring hle.