Giroud-a'n Milan a pan hnai

Chelsea striker Olivier Giroud chuan AC Milan nen inremna an nei hnai a, he thuziak i chhiar meuh chuan French striker hian Serie A club hi a zawm tawh hial mai thei.

Kum 34 mi hian kum hnih chhung atan contract a ziak tura ngaih a ni a, a man zat tur hi puan zar ni chiah lo mah se euro maktaduai khat bawr vel ni tura ngaih a ni. Italian chanchinbu La Gazzetta dello Sport chuan kum khatah euro maktaduai thum a hlawh dawn niin an tarlang bawk.

Giroud hian January 2018 khan Chelsea hi Arsenal aṭangin a zawm a, hetihlaia a man zat hi pound maktaduai 18 a ni - thla hmasa lawk khan kum 2022 thleng cham turin contract thar a ziak a, a rilru thlakin a chhuak leh ta zawk si dawn niin a lang.

Chelsea hian season hmasa ṭan dawn khan German forward pahnih Kai Havertz leh Timo Werner an lalut a, Giroud-a dinhmun a nghet lo zui - season tluan khan league match riatah chiah bul a ṭan a, inelna hrang hrangah match 31 inlanin goal 11 a khung.

French striker hian Blues-a a cham chhungin inelna hrang hrangah match 119 khelin goal 39-a khungsak a, assist vawi 14-a nei - Champions League, Europa League leh FA Cup-ah a champion pui.

Ligue 1 club Montpellier aṭanga Arsenal pantu hian mimal ang chuan Gunners-ah hun duhawm zawk a hmang a, inelna hrang hrangah match 253 khelin goal 105-a khungsak a, assist vawi 41 a nei.

Arsenal tan hian FA Cup-ah vawi thum a champion a, France tan World Cup nomawi a chawi tawh bawk - ram tan match 110-ah goal 46 a khung thei a, ram tana goal khung hnem lamah Thierry Henry (51) chu a tluk loh awmchhun a ni mek.