Sturridge-a'n Mallorca training a zawm

English striker Daniel Sturridge chuan Real Mallorca training a zawm dawn a, Liverpool striker hlui hian March 2020-a Turkish club Trabzonspor a chhuahsan hnuah club a nei leh tawh lo.

Kum 31 mi striker hi a vanglai chuan England striker beiseiawm ber pawl a ni a, mahse, hliam vangin a nih tur ang a ni phak lo - Manchester City aṭanga a career ṭanin Chelsea leh Bolton Wanderers (loan) tan a khel tawh bawk.

Chelsea tan Premier League, FA Cup leh Champions League nomawi a chawi hnuin January 2013 khan Liverpool a zawm a, Reds-ah hian a career-a hun duhawm ber pawl a hmang anga ngaih a ni.

Luis Suarez nen 2013-14 season-a Liverpool tana an inkawp chu English football-a striker inkawp fuh ber pawla sawi an ni a, SAS hming lem hial pek an ni - he season-ah hian match 33 khelin goal 24 a khung a, PFA Team of the Year-ah hial a lang phak.

Reds-ah hian season ruk leh a chanve a cham chhungin match 160-a khelhsak a, goal 68 khungin assist vawi 26 a nei a, Champions League nomawi a chawi - hliam vangin talbuai lo se hei aia record duhawm zawk hi a nei ngei ang.

Kum 2019 khan free transfer-a chhuakin Trabzonspor a zawm a, Turkish club tan hian inelna hrang hrangah match 16 khela goal sarih khungin assist vawi li a nei.

Mahse, March 2020-ah khan sum thapna lama a lo inhnamhnawih avangin match li chhung khawi ramah pawh, inkhel thei lo tura hrem a ni a, Trabzonspor nen kum thum atan inremna nei mah se a contract tihtawpsak a ni zui.

Sturridge hian Sevilla nen an indawr laiin a unaupa chu Sevilla-a a kal tur thu hrilhin, chutah chuan a sum thap turin a hrilh a ni - La Liga club hi a pan ta lo thung.

Mallorca chuan, "RCD Mallorca chuan season inbuatsaih nana July 14 aṭanga first team training kan neih tur zawm turin Daniel Sturridge chu a sawm a ni," an ti.

Sturridge hian Mallorca-ah contract a hmu thei a nih chuan a career-a a vawi khatna atan La Liga a khel dawn tihna a ni - Mallorca hian season hmasa kha Segunda division lamah hun an hmang.